کراچی ءَ بیگواھیں مردمانی ھاتر ءَ زھرشانی برجاہ

آؤکیں وھد ءُ جاور ھال چد ءُ گیشتر گرانتر بنت – ماما قدیر بلوچ

سندھ ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ چار ھزار ءُ پنچ سد ءُ پنجاہ روچ سرجم بوتگ – زھرشانی بنجل ءَ کراچی لیاری ءَ چہ سیاسی ءُ چاگردی باسک بلوچ یکجھتی کمیٹی کراچی ڈپٹی آرگنائزر عبدالوھاب بلوچ، بانک ماھگنج بلوچ، سونی بلوچ ءُ دگہ مردماں ازھار یکجھتی کتگ –

ھمے وھد ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ ات کہ بلوچ زالبولانی آوار جنی بلوچ چاگرد ءِ ھاتر ءَ نوکیں وئیلے نہ انت بلے راستی ھمیش انت تاں ھما وھد ءَ بلوچ راج ایردست اِنت آئی ءِ ننگ ءُ ناموس سر ءَ مدامی ھمے وڑ اُرش بیت اِنت –

آئی ءِ گوشگ ات کہ اے سنگینیں جیڑہ ءِ سر ءَ گور پگر کنگ ءِ سک باز زلورت انت پرچاکہ بلوچانی سیاسی ءُ پُرایمنیں جھد ھاکمانی واستا مرگ ءِ جوڑ بوگ ءَ انت دژمن وتی مرگ ءَ چم ءِ وت گندگ ءَ انت درسیں جنگی کانود پروشتگ ءُ زوراکی گڈی سیمسران انت آؤکیں وھد ءَ بلوچانی گِسانی تہ ءَ دور کنگ ءُ چک ءُ زالبولانی نشانگ کنگ ءِ تہ ءَ گیشی آرگ بیت اِنت ـ دژمن ءِ زلم ءُ زوراکیاں ھچ بلوچ پھریز نہ انت –

آئی ءِ گوشگ کہ مارا آؤکیں وھد زانگی انت ءُ ترندیں جاور ھالاں گوں دیمپانی کنگ ءِ ھاتر ءَ وت ءَ زھنی ھوالہ تیار کنگی انت – بلوچ راجی جھد بیگواھیں بلوچانی یل کنائینگ ءَ گیشتر مھکم کنگ ءِ ھاتر ءَ بلوچ راج ءَ وتی راجی تاکت کارمرز کنان ءُ ھر سازش بے سوب کنگ ءِ ھمراھی ءَ بلوچ لیڈر شپ گلانی پاٹیاں یکجاھی ءِ زور بہ دے اَنت آھانی مئے جوانیں یکجاھی ءَ کرد ءِ پیلو بہ کن انت اگاں ما اے وڑ کنگ ءَ بے سوب بوتیں گڑا وتی پرزندانی یل کنگ ءَ دگہ یک کرنے ءِ درکار بیت ءُ مئے گور ءَ انچو وھد نیست –

ماما قدیر بلوچ ءِ گوشگ ات کہ ھر یک مردم ءَ لوٹ ایت آ ھرکس بہ بیت آئی ءَ اجازت انت آ مئے نزوری ءُ کوتاھیاں مارا شون بہ دنت اگاں آ راست گوش ایت مارا وتی پلگار کنگی انت اگان آئی ءِ راستی گل ءُ راج ءَ پائدگ دنت گڑا آئی ءِ سر ءَ امل کنگی انت پُرایمنیں جھد ءِ باسکاں وتی امل راجی لوٹانی ھوار کن انت وتی مکسد ءِ ھک ءَ سرجمی ءَ اوست دار انت ءُ ھچ وڑین ھیال ءُ نزریہ ءَ دیم ءَ چیر نہ دے اَنت کہ راجی لوٹانی ھک ءَ بہ بنت –