تربت بازار ءَ ایف سی ءِ نیمگ ءَ جنگ بوتگیں ٹٹانی زوت دور کنگ ءِ پیسلہ

بلوچستان ءِ دمگ کیچ تربت ءَ مروچی آدینگ ءِ روچ ءَ آل پارٹیز کیچ ءِ باسک ڈپٹی کمشنر کیچ ءَ گوں دچار کپتگ انت ءُ ایف سی ءِ نیمگ ءَ جنگ بوتگیں ٹٹانی دور کنگ ءِ درگت ءَ وتی ھیال درشان اتگ انت –

آئی ءَ چہ پد ڈپٹی کمشنر کیچ ءِ ھمراھی ءَ آل پارٹیز کیچ ءِ رھشوناں بازار ءِ تر ءُ تاب کتگ ءُ ھما جاھاں شتگ انت کہ ٹٹ جنگ ءُ دگ بند کنگ بوتگ انت –

آل پارٹیز کیچ ءِ ڈپٹی کنوینر غفور کٹور، بی این پی ءِ رھشون ظریف زدگ بلوچ، پیپلز پاٹی رھشون نواب شمبے زئی، نیشنل پاٹی ءِ رھشون طارق بابل، پریس سیکرٹری سراج بیبگر، بی این پی دمگی رھشون محسن بلوچ، انجمن تاجران تربت ءِ سرکماش حاجی کریم بخش، کمک سرکماش نثار جوسکی، اسحاق روشن دشتی ءُ جمال مری ھوار دگہ گون بوتگ انت –

اشی ءَ پیش آل پارٹی ءِ دیوان ءِ اڈ دیگ بوتگ کہ دگانی سر ءَ جنگ بوتگیں ٹٹانی دیر نکنگ ءِ درگت ءَ وتی ھیال درشان اتگ انت ءُ پد ءَ ھمے درگت ءَ ڈپٹی کمشنر ءَ گوں دچار کپگ ءِ پیسلہ کتگ آئی ءَ چہ پد یک ٹولی ءَ گوں ڈی سی کیچ حسین جان بلوچ ءَ گوں دچار کپتگ انت –

دچار کپگ ءَ پد آل پارٹی ءُ ڈپٹی کمشنر ھما جاھانی تر ءُ تاب کتگ کہ اود ءَ سیکورٹی ءِ نام ءَ ٹٹ جنگ بوتگ ءُ دگ بند کنگ بوتگ انت، آل پارٹی ءُ انجمن تاجران ءِ ٹولی ءَ پبلک دگ بند کنگے درگت ڈپٹی کمشنر سرپدی داتگ درسیں ٹٹ دیر کنگ ءُ دگ پچ کنگ ءِ لوٹ کتگ –

آل پارٹی کیچ ءَ گوشتگ کہ اگاں دگ پچ کنگ نہ بوتاں گڈا آشی ءِ بگیری ءَ ترندیں گامگیج زورگ بیت ءَ شاھدگ بند کنگ بیت انت ءُ بازاز ءَ شٹر ڈاؤن ھرتال کنگ بیت انت –

ڈپٹی کمشنر کیچ ءَ آل پارٹی کیچ ٹولی باور کنائینتگ کہ آدینگ ءِ بیگاہ ءَ تاں اسسٹنٹ کمشنر تربت عقیل کریم ءَ ڈی ایس پی ستار مگسی درسیں ٹٹانی دیر کنگے ہدایت داتگ –

آھانی گوشگ ات کہ ھما جاھاں کہ ٹٹ جنگ بوتگ آ پبلک دگ انت ءُ کہ سرکار ءَ بجٹ ھرچ کتگ دگ بستگ تانکہ مردماں سھولت بہ رسیت اھانی سر ءَ ٹٹ جنگ بہ بیت ءُ مردم گیشتر مشکلانی تہ ءَ دور داتگ –

آھانی گوشگ ات کہ آل پارٹی ءِ درگت ءَ مطمئین بہ بیت کہ آدینگ ءِ بیگاہ ءَ تاں آھانی لوٹانی ازالہ بیت –