بلوچستان ءِ باپاری شھر حب چوکی ءَ ناشناسیں مردماں پاکستانی پوج ءِ باسک ایف سی ءِ اولاک گوں بمب تراک ءَ نشانگ کُتگ۔
لشکریانی اولاک بلوچستان ءِ باپاری شھر حب چوکی ءَ ساکران دگ ءِ سر ءَ نشانگ کنگ بیتگ۔ ھالانی ردءَ اے اُرش ءِ تہءَ اولاک ءَ سواریں بازیں کارمند ٹپیگ بیتگ اَنت۔
بلے داں انگت اے تراک ءِ درگت ءَ واکدارانی لیکہ دیما نئیتکگ وھدیکہ ھندی اھوالاں تراک ءِ تہءَ کارمندانی ٹپی بیگ ءِ ھال راست کُتگ۔
زانگ بہ بیت کہ ھمے یکے ھپتگے تہءَ اے چُشیں سیمی اُرش اِنت چریشی ءَ پیسر انچیں اُرش یے تہءَ کیچ دمگ ءِ ھنکین ناصر آباد ءَ لشکری نشانگ بیتگ اِت اَنت ءُ آئی ءَ پد قلات ءَ ھم ھمے پئیم ءَ نشانگ کنگ بیتگ اِت اَنت۔
ناصر آباد اُرش ءِ زمہ واری بی ایل اے ءَ زرتگ اَت بی ایل اے جارکش ءِ ردءَ اُرش ءِ تہءَ ھپت کارمند کُشگ بیتگ اِت اَنت، بلے مروچی بیتگیں اُرش ءِ زمہ واری داں انگت ھچ گلءَ نہ من اِتگ ۔