پی ایم سی ءِ رویش ءِ بگیری ءَ زھرشانی کنگ بیت اِنت

بلوچستان میڈیکل کالجانی یکجاھیں پتر میڈیکل الائنس کمیٹی ءَ شال ءَ نودربرانی زھرشانی درگت ءَ رسانکدراں گوں تران کنان ءَ گوشتگ کہ نودربر شش جنوری ءَ وتی لوٹانی ھک ءَ زھرشانی کن انت –

شال پریس کلب ءِ دیم ءَ اھوالکاراں گوں تران کنان ءَ نودربرانی گوشگ ات کہ میڈیکل کالج ءَ داکلہ زورگ ءِ ھاتر ءَ ھزارانی کچ ءَ نودربر انٹری ٹیسٹ دے اَنت کالجانی تہ ءَ میرٹ ءِ بنیاد ءَ گچین کنگ بنت کہ آھاں پد ءَ رند ءَ پی ایم سی رجسٹر کنت بلے ادا چو دگہ وڑ ءَ انت کہ میرٹ ءِ بنیاد ءَ داکلہ ءَ بوگ ءَ ابید ھم نودربراں رجسٹر بوگ ءِ ھاتر ءَ ٹیسٹ دیگ کپ ایت اگاں اے میان ءَ کسے پیل بہ بیت گڑا آئی ءِ کیرئیر ھمے جاہ ءَ اوشت ایت کہ سراسر ناھکی اِنت –

اھوالکاراں گوں تران کنان ءَ میڈیکل الائنس کمیٹی ءِ رھشونانی گوشگ ات کہ پی ایم سی ءِ ایکٹ ءَ چوشیں ٹیسٹ نیست ءُ ناکہ دگہ کالجاں چشیں ٹیسٹ گرگ بوتگ وھدیکہ پی ایم سی ءِ بلوچستان ءَ ھستیں سَے رجسٹریں کالج انت گڑا اے وڈیں ٹسٹ گرگ ھچ مول نیست ھالانکہ اے درسیں بیچ فیلوز ءِ انٹری ٹیسٹ پاکستان ءِ وتی رجسٹریں ادارھاں گپتگ انت -.

آھانی گوشگ ات کہ وڑیں چکاسانی بگیری ءَ گوستگیں بیست ءُ پنچ روچ انت کہ مئے زھرشانی شال پریس کلب ءِ دیم ءَ برجاہ انت شما درسیں تک ءُ پھناتاں سیادی داروکین مردم مئے اے جیڑہ ءَ سرپد انت بلے اشی ءِ پشدرہ ھما بندات ءَ بگر تاں روچ مروچی ھچ سرکاری نمائندگاں مئے جیڑہ وتیگی نہ کرتگ ءُ نہ اتکگ انت ناکہ اے جیڑہ وتیگی لیکتگ ءُ الکاپی ءَ گوں جیڑہ گیش ءُ گیوار ءَ کوشست کتگ –

نودربرانی گوشگ ات ما ھر وھد ءَ اے وپتگیں ھاکمانی دروازگاں ٹکیں ءُ آھاں وتی زمہ واریانی مارشت ءَ دے اَنت بلے آھانی نیمگ ءَ چہ دنیگت ءَ ھچ وڑیں گامگیج زورگ نہ بوتگ – ما مدامی دست بستگ ءُ وتی لوٹانی منگ ءِ ھاتر ءَ گوشتگ بلے آ مدامی واب انت – ھاکمانی بے بسی ءُ ردیں پالیسیانی سبب ءَ ما لاچار بوتگیں کہ زھرشانی بہ کنیں پرچا کہ ما وتی ھکیں لوٹانی گرگ ءَ تاں آھانی گوشاں وتی آواز ءَ سر کنیں اے ناروائیں سلوک بس مئے باندات ھراب کنگ ءَ ابید دگہ ھچے نہ انت –

اھوالکاراں گوں تران کنان ءَ میڈیکل کالج ءِ نودربرانی گوشگ ات پی ایم سی ءِ گوم ءَ نندگ ءَ مئے نمائندگ مئے باندات ءِ گوم ءَ گوازی کنگ ءَ انت مئے نمائندگ وتی کوتاھیانی باراں مئے سر ءَ لڈگ انت –

نودربراں وتی پریس کانفرنس ءِ گڈی ءَ جار جتگ کہ ما شش جنوری ءَ بزاں پنچ شمبے روچ ءَ شال ءَ وتی زھرشانی رونک ءِ کشیں وتی لوٹانی منگ ءَ تاں وتی زھرشانی ءَ برجاہ داریں – اگاں اے میان ءَ جاورھال نگیگ بوتاں گڑا زمہ دار بلوچستان سرکار، جانسلامتی سیکریٹری ءُ پرنسپل بنت – ما بلوچستان ءِ درسیں نودربراں ھوار ھر تک ءُ پھناتاں سیادی داروکیں مردماں چہ لوٹ کن ایں کہ زھرشانی روانک ءَ بھر بہ زور انت مئے ھمراہ داری ءَ بہ کن انت –