بالگتر اُرش ءَ پاکستانی پوج ءِ شش کارمند کُشتگ – بی ایل ایف

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کرتگیں درشانی ءِ تہءَ بالگتر ءَ پاکستانی پوج ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں روچ ءَ یکشمبے ءِ سھب ادار دہ ءَ پنجگور ءَ بالگتر ءِ دمگ جکین گوران ءَ پیسر ءَ چہ راہ بستگ ءُ پوجی کاروان ءِ سر ءَ اُرش کتگ –

جارکش ءَ گوشتگ کہ پوجیانی کاروان ءَ ھشت گاڑی ھوار بوتگ کہ آھانی تہ ءَ سَے گاڑی اُرش ءِ زد ءَ اتکگ انت – اُرش ءِ آسر ءَ گاڑیاں تاوان رستگ ءُ سواریں شش کارمند مرتگ ءُ بازینے زدگ بوتگ –

آئی ءَ گوشتگ کہ اُرش ءَ پد زورگیریں پوج ءَ وتی جنگی بالگرد لوٹارینتگ انت ءُ بازیں جاہ ءَ شیلنگ کرتگ چریشی ءَ یک سینزدہ سالی شوانگ بہارک ء مراد پیری کور شھید بوتگ –

آئی ءَ گوشتگ کہ ھمے وڈ زامران ءِ ھم بازیں دمگاں پاکستانی پوج ءَ بمبگواری کتگ –