نبشتانک: دشت ءِ نرمزارانی شھیدی ءِ ششمی سالروچ
نبشتہ کار: گلزمان بلوچ
دی بلوچستان پوسٹ
دشت ءِ وش لزتیں کوش ، پلانی گواڑگ ، سیل ءُ سواد ھر مولم ءِ وشی چہ ورنایانی دل ءَ در بوان اَت، مردمانی بدپیلی گیش، وت ماں وت جنگ ءُ چوپ، نشہ ءُ دگہ سلیں کار روچ پہ روچ ودان اَت۔ ھمے میان ءَ آشوب ءَ ھم سر ماں دشت ءِ جلگھیں زر ءَ دور دات، ھما ورنایاں کہ اِے سرجمیں لزتانی روگ اِے بدپیلی ءُ بدیں کرد مار اِت اَت۔ اول سرْپ ءِ ھما جنگولاں گوں ھوار بوت اَنت ، پہ ننگ ءَ پہ پدمنتگی ءَ پہ بلوچ ءِ وتواجھی ءِ ھاتر ءَ تپنگ اِش چست کت، کوھاں یاگی بوت اَنت، گوں مزن جگری ءَ دژمن ءِ دیم ءَ جنگ اِش داشت، روچ ءُ شپ اِش چار اِت ناں سارتی ءُ تبد، ھر رنگ ءَ وتی جھد ءِ سربلندی ءُ وتی مول ءُ مراد ءِ سر ءَ وت ءَ کربان اِش کت، ھر کجا دژمن ءِ ھالے بوت آیاں مدام دژمن ءِ سر بست ءُ جنگ اِش کت ءُ دژمن ءِ پندل اِش بے سوب کت اَنت۔
ھمے رنگ ءَ دوھزار سینزدہ ءِ گچینکاری ءِ وھد ءَ ماں دشت ءِ دمگ ءَ دژمن بے سوبی ءِ آماچ اِش کت۔ ھر کارے ءَ دژمن ءِ پندل بے سوب بوت اَنت پہ دژمن ءَ ھچ راہ نیست اَت، آئی ءَ دشت ءَ پہ وت ءَ مزنیں کیمپے جوڑ کنگی اَت ، چہ اِے سوچ ءُ چارگ ءَ پد مرچی ءَ چہ شش سال ساری دوھزار پانزدہ ءِ گڈی ماہ ءِ بیست ءُ دو رمس بزانکہ مرچیگیں روچ ءَ مزنیں کچے ءَ لشکر ءَ وتی گاڑی ءُ موٹل زرت اَنت ءُ دیم پہ دشت ءَ دات، وھدے اِے ھال ماں دشت ءِ نرمزاریں بچاں سر بوت، گڑا آیاں دژمن ءِ راہ بست ، پد ءَ جنگ بندات اَت، ھر نیمگ ءَ تیر ءُ تپنگانی توار اَت، دراھیں مھلوک ءَ پہ نرمزارانی ھاتر ءَ نیک دوائی اَت ءُ پہ دژمن ءَ بے سوبی ءِ دوا اَت۔
لشکر ءَ مزنیں کیمپے دشت ءِ دمگ بلنگور ءَ جوڑ کنگی اَت ، بلے نرمزاراں انچش آئی ءِ دیم داشت کہ دہ بیست کلومیٹر ءِ راہ ءَ دژمن ءَ پورھیں روچے لگ اِت، سھب ءِ بانگواہ ءِ لشکر گوں مزنیں سلاہ ءُ توپاں ھیلتے شپ ءِ وھدے ءَ سر بوت اِے نرمزاراں انچیں میڑے دات کہ ھچ دیم ءَ کنز اِت ئِے نہ کت ، گڈی ءَ جنگی بالگتر ئِے آؤرت اَنت۔ اِے جنگ ءَ لشکر ءِ مزنیں کچے ءَ کماندار ءُ سپاھیگ مرت اَنت ءُ زدگ بوت اَنت۔
اِے جنگ ءَ بی ایل ایپ ءُ بی آر اِے ءِ سنگت دوئیں ھور اِت اَنت۔ جنگ ءَ پد شش بی آر اِے ءِ سنگت ءُ دو بی ایل ایپ ءِ سنگت ءِ شھیدی ءِ ھال بوت، چہ اِے سنگتاں بی ایل اِیپ ءِ شھید سابر ءُ شھید داد جان ، بی آر اِے ءِ شھید گنی ، شھید جلال، شھید امان، شھید پارس، شھید التاپ ءُ شھید بالاچ اِت اَنت۔
اِے نرمزاراں وتی مزن جگری ءَ گوں جنگ داران کت ءُ وت ءَ مدامی راج دپتر ءَ نمیران کت، مرچی ششمی سالروچ اِنت ءُ آیانی نام پہ شان گرگ بیت ، آ ابدی نمیران اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔