بیگواھیں نودربرانی یل کنائینگ ءِ ھاتر ءَ بلوچستان ءِ نودربر گلاں شال ءَ زھرشانی کنگ ءِ جار جتگ

شال ءِ پریس کلب ءَ بلوچستان نودربر گلاں پریس کانفرنس کنان ءَ گوشتگ کہ ھنچوش کہ شما دُرست سرپد اِت ھمے سال ءِ یک نومبر ءَ بلوچستان شاھدربر جاہ ءَ دو نودربر سھیل بلوچ ءُ فصیح بلوچ زورانسری آوار جنگ ءُ بیگواہ کنگ بوتگ انت کہ تنی وھدی آھانی ھچ وڑیں ھال بود ءِ نیست – بلوچستان شاھدربر جاہ ءَ دو نودربرانی زورانسری آوار جنی ءِ بگیری نودربرگلاں زھرشانی کنان ءَ شاھدبرجاہ بند کتگ کساس سَے ھپتگ ءَ پد سرکار ءِ نیمگ ءَ راہ داتگیں مزاکراتی کمیٹی ءِ گوم ءَ مئے نیاد بوتگ بلے مزاکراتی کمیٹی ءِ ھچ وڑیں گامگیج زورگ بوگ ءَ گندگ آیگ ءَ نہ انت کہ پدردی ئے –

آھانی گوشگ ات کہ بلوچستان ءَ زورانسری آوار جنیانی درچ بازیں دھکاں یکشل ءَ برجاہ انت کہ بلوچستان ءَ ھر تک ءُ پھناتاں سیادی داروکیں مردم اے گیر انسانی گیرکانودی املے آماچ بوتگ انت ءُ درساں گیش نودربر ءُ زانتکار اے امل ءِ آماچ انت – بلوچستان ءَ یک نیمگے زانشتی نزام نیستی ھساب ءَ انت ءُ دومی نیمگ ءَ زانشجاھاں تُرس ءِ ودینگ بوگ ءَ انت کہ اود ءَ نودربر وتی زانشتی ءُ ساچشتی سلاھیتانی تراشگ ءَ زبھر انت – زانشجاھانی تہ ءَ سیکورٹی پوج روچ پہ روچ گیش کنگ بوگ ءَ انت زانشجاہ درسگاہ کم بلکیں پوجی بنجل گندگ بنت- زانشجاھانی واکدار سیکورٹی نام ءَ اربانی کچ زر گِر اِنت بلے شاھدربر جاہ ءِ ھاسٹلانی تہ ءَ نودربراں پھریز کرت نہ کن اَنت –

آھانی گوشگ ات کہ بلوچستان ءِ شاھدربر جاہ ءَ سھیل بلوچ ءُ فصیح بلوچ ءِ زورانسری آوار جنی ءِ اے اولی وئیل نہ انت بلکیں اشی ءَ پیش سدانی کچ ءَ نودربر بلوچستان ءِ شاھدربرجاھاں چہ آوار جنگ ءُ بیگواہ کنگ بوتگ انت چوش کہ گوستگیں ھپتگ ءَ گوادر شاھدربر ءَ چی سَے نودربر زورانسری آوار جنگ ءُ بیگواہ کنگ بوتگ – بلوچستان ءِ نودربراں زانت ءِ دربرگ ءِ ھاتر ءَ بازیں اڑاندانی دیمپانی کنگ کپ ایت ءُ ھمود ءَ زانشجاھاں زانت ءِ دربرگ نودربرانی ھاتر ءَ وبائے جان جوڑ بوتگ نودربر اے زانشجاھاں ھچ وڑ ءَ پھریز نہ انت زانشجاھاں چہ یکشل ءَ نودربرانی زورانسری آوار جنی ازاب ءَ چہ کمتر نہ انت-

آھانی گوشگ ات کہ یک نومبر ءَ بلوچستان شاھدربر جاہ ءَ زورانسری آوار جنگ بوتگیں نودربر سھیل بلوچ ءُ فصیح بلوچ یل کنائینگ ءِ ھاتر ءَ شاھدربرجاہ ءِ نودربر ءُ بلوچستان ءِ نودربراں روانک کش اِتگ ءُ شاھدربرجاہ ءِ واکداراں چہ لوٹ کتگ کہ آھانی یل کنگ ءَ وتی کرد پیلو بہ کن انت بلے شاھدربر جاھے واکداراں نودربرانی زورانسری آوار جنی ھچ وڑ ءَ سنجیدگی نہ زرتگ – شاھدربر جاھے واکدارانی سنجیدگی نزورگ ءِ سبب ءَ نُھ نومبر ءَ نودربر گلاں شاھدربر جاہ ءِ درسیں سرگرمی بند کتگ انت ءُ شاھدربرجاھے دروازگ ءِ دپ ءَ نندانک جتگ کہ ھژدہ روچاں نندگ ءَ پد سرکار ءِ دیم داتگیں مزکراتی کمیٹی ءِ گون ءَ نندگ ءَ پد زھرشانی پانزدہ روچ ءِ واستا ھلاس کتگ- سرکار ءِ نمائندگ ءَ مار ءَ باور کنائیننتگ کہ پانزدہ روچ ءِ تہ ءَ نودربر دیم ءَ آرگ بنت نوں چوش کہ کرار ءِ وھد ھلاس بوتگ ناکہ نودربر زاھر کنگ بوتگ انت ناکہ چشیں گامگیج زورگ گندگ بوگ ءَ انت-

آھانی گوشگ ات سھیل بلوچ ءُ فصیح بلوچ ءِ یل کنائینگ ءِ ھاتر ءَ سَے ھپتگاں سارتی سر ءَ نندگ ءُ زھرشانی پد سرکار ءِ نودربرانی یل کنائینگ ءِ ھچ وڑیں گامگیج زورگ ءَ نہ انت سرکار ءِ مزاکراتی کمیٹی باور کنائینگ دروگ بوت انت ھردو نودربرانی زورانسری آوار جنی ءَ نوں ماھے کپے ءَ گیش گوستگ بلے انگت بیگواھیں نودربر زاھر کنگ نہ بوتگ انت – سرکار ءِ بے وسی ءِ گندگ ءَ ما اے پریس کانفرنس ءِ تہ ءَ وتی زھرشانی لڑ جار جنیں کہ آئی ءِ بندات چہ شال ءَ کنگ بوگ ءَ انت – باندا ھژدہ دسمبر سال دوھزار ءُ بیست ءُ یک ءَ ادار دو ءَ شال پریس کلب ءِ دیم ءَ زھرشانی کنگ بیت اِنت آئی ءَ چہ پد دگہ دمگاں زھرشانی کنگ بیت اِنت –

آھاں چہ بلوچستان ءِ درسیں نودربر ءُ باشعوریں راج ءَ چہ لوٹ کتگ گوشتگ کہ آ نودربرانی یل کنگ ءِ ھاتر ءَ مئے زھرشانیاں بھر بہ زور انت –