21 دسمبر “بلوچ ویمن ڈے ” ءِ نام ءَ دارگ بیت اِنت – بی ایس او آزاد

بلوچ اسٹوڈنٹس آرگنائزیشن آزاد ءِ جارکش ءَ گُشتگ گل ءِ گوستگیں چیئرپرسن لمہ ء وطن شھید بانک کریمہ ءِ شھیدی ءِ روچ ءَ بلوچ ویمن ڈے ءِ دروشم ءَ دارگ ءِ جار پرینتگ ءُ گوشتگ کہ بلوچ راجی رھشون شھید بانک کریمہ ءِ جد ءُ جھد ءِ برورد اِنت کہ آئی ءِ جد ءُ جھد ءَ راج ءِ دراھیں پھنات گیشتر بلوچ زالبولانی واستا یک راھے پچ بیتگ – آئی ءِ گران بھائیں دیمھونیانی جد ءُ جھد ءِ ستاشانی ءِ پیش کنگ ءِ واستا آئی ءِ شھیدی ءِ روچ ءَ بلوچ ویمن ڈے دارگ بیت اِنت –

آئی ءَ گُشتگ کہ بانک کریمہ بلوچ راجی جنز ءَ سرھیلیں رھشون ءُ آئی ءَ وتی جد ءُ جھد ءُ کربانیاں بلوچ راجی جنز ءَ را روھے بکش اِتگ -آئی ءَ گُشتگ کہ بلوچ راجی جنز یک ھنچیں درے ءَ گوزگ ءَ بیتگ ءُ آئی ءَ رھشونی کرتگ ءُ بلوچ چاگرد ءَ زورگر ءِ زُلم ءُ زوراکیانی بازار گرم بیتگ – زورگر ءِ تاکت ءَ پروشگ ءُ بلوچ چاگرد ءَ وابیں زالبولانی جنزینگ ءَ زالبولانی چاگرد ءِ دیمروئی ءُ راجی جد ءُ جھد ءُ چہ دور کنگ بیتگ اَنت ءُ دومی نیمگ ءَ ریاست بلوچ راجی جنز ءِ ھلاس کنگ ءَ بے کساسیں زوراکی کارمرد کنگ ءَ بیتگ – بانک کریمہ بلوچ ءَ اے راجدپتری جھلانکیں راہ ءَ دراھیں اڑانڈ یک گور کتگ اَنت ءُ بلوچ راجی جنز ءِ مھکم کنگ ءِ جھد کتگ ءُ بلوچ ورنا گل ءِ پتر ءَ یکجاہ کنان کتگ اَنت ءُ راجی جنز گیش مھکم کنگ ءِ جد ءُ جھد کتگ – آئی ءِ جد ءُ جھد ءُ کربانی ءِ برورد ءَ مروچء راجی جنز ءَ مھکم اِنت ءُ مھکمیں دروشمے ءَ سر بیتگ بلوچ زالبولانی یک مزنیں کچے ءَ راجی سیاست ءِ بھر بیتگ اَنت ءُ مروچی راجی آجوئی ءِ جنز ءَ مردینانی گون ءَ ھمکوپگی ءَ جد ءُ جھد ءَ کنگ اَنت –

آئی ءَ گُشتگ کہ بلوچ چاگرد یک ھنچیں چاگردے اشی ءِ بنکی سیکولر سوچ ءَ سریچ اِنت کہ ھمود ءَ ھر وھد ءَ ابید جنسی روا بلوچ مردین ءُ زالبول ھمکوپگ اَنت بلوچ راج راجدپتر گواہ اِنت بلوچ سرڈگار وھدیکہ کجام زورگر ءَ بدیں چماں چارگ ءِ جھد کتگ گڑا بلوچ راج ابید کجام جنسی، جھل ءُ برزی ءُ ٹکی برزی اُرشکاراں پروش وارتگ – زورگراں ھروھد ءَ اے وھد ءَ راجی بنزہ ءِ ھلاس کنگ ءُ راجی کاز ءِ تاوان دیگ ءَ بلوچ چاگرد ءُ گڑ ءُ بڑانی پیداک کنگ ءَ جھد ءِ کتگ چُشکہ انگریزانی زوراکی ءَ بندات بیتگ ءُ بلوچ سرڈگار ءِ سر ءَ پاکستانی زورگری ءَ پد اے بدیں کردیں امل ءَ بیتگ اَنت بلوچ چاگرد ءِ بگاڑینگ ءُ راجی زھن ءَ ھمود ءَ مٹ کنگ ءَ ریاست ءِ پنجگانی تہ ءَ بیتگ اَنت راجی جنز ءَ اے وڑیں بازیں پندل بے سوب بیتگ اَنت ءُ اے وڑیں دراھیں پندلانی دیم ءَ مھکمیں دیوال ءَ مِک بیگ ءَ جوانیں کردانی ھمراھی ءَ شھید بانک کریمہ بیتگ کہ آئی ءَ بلوچ راجی جنز ءِ رھشونی کتگ ءُ بلوچ زالبولانی مزن شانیں جد ءُ جھد ءَ مردینانی گون ءَ ھمکوپگ بیتگ اَنت – بانک کریمہ بلوچ ءَ ات راجدپتری کرد ءَ ھما چراگ کہ روک کرتگ کہ آیاں سرڈگار پھاز اِتگ ءُ وتی ساہ ءُ سر کربان کرتگ اَنت شھیدی ءِ منگہ گپتگ اشانی کربانی سبب ءَ مروچی سدانی کچ ءَ بلوچ زالبول آجوئی ءِ راہ ءَ جنزگ ءَ اَنت –

آئی ءَ وتی درشان ءِ گڈسر ءَ گشتگ کہ لمہ بانک کریمہ ءَ نا ایوک ءَ گل ءِ واستا بلکیں بلوچ راج ءِ یک ھنچیں سروکی ءِ کرتگ کہ چریشی ءَ بلوچ راج گیشتر ورنایانی واستا یک ھنچیں راھے پچ بیتگ کہ راجی آجوئی، وت واجھی ءُ رژنائیں باندات ءِ مانزمان اِنت ءُ آئی ءِ بے کچوئیں جد ءُ جھد ءِ برورد ءَ ھزارانی کچ ءَ زالبول راجی جنز ءِ بھر بیگ ءَ اَنت ءُ جنز ءِ رھشونی ءَ کنگ ءَ اَنت – آئی ءَ گُشتگ کہ بلوچ راجی جنز ءِ جد ءُ جھد ءَ شھیدیانی درچ بندات کتگ آئی ءِ دیمھونی ءُ ستاشانی ءِ پیش کنگ ءِ واستا گل ءَ بیست ءُ یک دسمبر ءَ بلوچ ویمن ڈے پہ بستاری ءَ جار ءَ جنت ءُ بلوچ راج ءَ گوں دزبندی اِنت کہ اے روچ ءِ درگت ءَ سرجمیں بلوچستان ءَ مراگش برجم دارگ بہ دار اَنت ءُ اے چریشی ءَ گل دراھیں بنزھاں بیست ءُ یک دسمبر ءَ بلوچ ویمن ڈے پہ بستار ء مراگش برجم داریں ءُ گل ءِ نیمگ ءَ چاگردی رسانکجاھاں کیمپین برجم داریں –