نبشتانک: سدو منی کلواں بر گوں
نبشتہ کار: گلزمان بلوچ
دی بلوچستان پوسٹ
تو انچیں جاھے ءَ روگ ءَ ئے کہ پیسر ءَ مئے ازیز ءُ کس ھزاراں شتگ پد ءَ کس ءَ پہ آیاں آیگ ءِ امیت نہ کش اِتگ، ارس گورتگ ءُ گم دل ءَ گک داتگ اَنت ءُ بس یات ءُ زھیر منتگ اَنت۔ بلے مرچی تو ھمایانی دیدار ءَ سر گپتگ ءُ روگ ءَ ئے ءُ ابدی ھمود ءَ بہ ئے، تو گوں ھمایاں نند ءُ دیدار کن ئے، وتی وَ سرجمیں ھالاں دے ئے کہ تئی زندمان چہ رنگ ءَ گوستگ بلے لھتے منی کلواں بر گوں ھما رپتگیں مردماں سر کن ، اِے ڈیھ ءِ جاور ھالاں یک یک ءَ بہ دے ءُ ھما ڈیھ ءِ نرمزاراں اِے مراد باتی ءَ ھم بہ دے کہ شمئے روگ ءَ پد راج دپتراں شمئے نام زندگ اِنت، شما نمیران اِت ، شمئے نام ھرکجا پہ ادب گرگ بیت۔ شمئے کاروان شمئے راہ ءِ روان اِنت ءُ شمئے ھوناں رنگ آؤرتگ۔ اول تو کہ رو ئے الم تئی چم گوں تئی مستریں برات ءَ شوھاز کن اَنت ، آ تئی وش اتکی ءَ پیسر ءَ اوشتاتگ ، آئی ءِ کش ءَ الم شھید سابر اوشتوک اِنت۔ ترا وش اَتک کن اَنت ءُ ھما مجلس ءَ بر اَنت کہ اود ءَ تئی ھند ءِ سرجمیں کسان ءُ مزن گوھار ءُ مات نندوک اَنت ترا مراد باتی دے اَنت، دیوان ءُ مجلس ءَ پد ڈیھ ءِ جاور ھالاں چہ تو جست گر اَنت، گڑا اِے کلواں الم بہ دے ءُ اول شھید میار ءَ بہ گش ، تئی ءُ شھید ساھل ءِ سیرکگیں ءِ ڈن ءِ جنگ ءَ لشکر ءِ تکے برتگ آ لشکر ءَ دپ ءِ وت شمئے ستا کتگ کہ شمئے کرد راج دپتر ءَ پہ شان گرگ بیت۔ شھید سابر ءَ ھم بہ گش کہ تئی داتگیں جنگ ءَ لشکر ءَ داں دو سال ءَ چہ وتی بنجل ءَ در اتک نہ کت۔
پد ءَ وھدے تئی چم ماں میتگ ءِ آ دگہ مردماں کپ اَنت یکے کشے ءَ واجہ گلام رسول اِنت ترا چارگ ءَ اِنت ترا الم جست گیپت کہ وتی ٹیل ءِ دکان ءِ بابت ءَ ، تو آئی ءَ بہ گش کہ تئی روگ ءَ پد تئی چک وتی رنگ ءَ بوت اَنت ءُ چیزے مدت ءَ کم کم ءَ دکان پچ اَت راھگوزی یے اتک ءُ تیل ئِے زرت بلے پد ءَ ھمے شومیں لشکر اَتک ءُ نشت راھگوزیاں اد ءِ آیگ بند کت ءُ دکان نہ چل اِت ءُ گڈی ءَ بند بوت۔
دومی دیم ءَ واجہ سلیمان اِنت تو دیم ءَ گوں ھمائی ءَ گور کن ءُ بہ گش ، تو وتی زند ءَ بازار ءِ تہ ءَ ھچ کس لوگے ءِ بندگ ءَ نئیشت کہ سرجمیں زمین منیگ اَنت بلے بژن کہ تئی روگ ءَ پد انچیں لشکرے اَتک تئی ھند ءِ سرجمیں میتگ ئِے وتی کتگ ھرجاہ دل ئِے لوٹ اِیت پہ وت لوگ ءُ جاہ اڑ کنت، تو اود ءَ بوتین ئے الم آیانی ٹکٹرانی دیم ءَ اوشتاتگ اِت ئے، مرچی تئی کمی ءَ تئی میتگ بداں وتی کتگ۔
دیمتر ءَ ھاجی ءَ ھمید کش ءَ نشتگ ءُ تبزیاں ژلک ژلکے پر ئِے دیم ءَ گوں ھمائی ءَ بہ کن ءُ بہ گش، تو میتگ یلہ دات ءُ شت ئے دگہ ھندے ءَ نشتگ ئے ، تئی لوگ ءُ جاہ ھر ءُ پسانی واڑ جوڑ بیتگ اَنت کہ نوں مردم نہ گش اِیت اد ءَ ڈاکے بوتگ ءُ مردم آباد بوتگ ، تو شت ئے شارے ءَ نشتگ ترا وتی دیار ءِ گماں شومک ءِ نادراھی یے دات ءُ گڈی ءَ ابدی جاہ ءَ شت ئے۔
پد ءَ وھدے تو دیم ءَ گوں زالبولاں کن ئے ءُ جان بی بی ءَ تئی چم کپ اَنت، الم اِے کلوان ئِے بہ دے ءُ بہ گش ترا یات بیت کہ مئے ھند ءَ زالبولیں اھوالکارے اَتک ءُ آئی ءَ لشکر ءِ زلم ءُ زوراکیانی بابت ءَ تر ءُ تاب کت ، تو ئے جان بی بی ءَ ھمے لشکر ءِ زلم ءُ زوراکیانی بابت ءَ باز گپ جت آئی ءَ تامری پیتبندے جوڑ کت، پد ءَ تئی روگ ءَ پد ھما تواربند سے چار سال ءَ رند رسانکدر ءَ شنگ اَنت ، تو گلامی ءِ ھلاپ ءَ توار چست کتگ ، تو وت ءَ نمیران کتگ ، تئی نام پہ شان گرگ بیت، تو راج ءِ دل ءَ ھم یک شیرزالیں زالے ئے۔
ھمے رنگ ءَ گڈی ءَ شمئے گپ ءُ مجلس بیت دگہ بازینے ءَ گوں نند ءُ نیاد بہ ئے ءُ کلاناں سلام سر کن ءُ بہ گش راج ءِ نرمزار گوں لشکر ءَ دیم پہ دیم جنگ ءَ اَنت ءُ بلوچ ءِ آجوئی ءِ چراگ روچ پہ روچ نوک بوان اِنت، کلیں سردیوک ءُ ھونریچوکیں نرمزارانی ھون ءَ آجوئی ءِ کندیل بلینتگ ءُ آجوئی راج ءِ چمانی دیم ءَ زاھر اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔