واشک: بیگواھیں عبدالمالک ءِ لاش دزکپتگ، کھول ءَ تھانہ ءِ دیم ءَ زھرشانی

بلوچستان ءِ دمگ واشک ءِ ھند ناگ ءَ گوستگیں روچ ءَ آوار جنگ بیتگیں عبدالمالک نصروئی ریکی ءِ لاش جت ءَ دزکپتگ –

کھول ءِ رد ءَ آوار جنگ ءُ کوش ءَ ھواریں گاڑی ءِ پجار کنگ بیتگ – دمگداراں گاڑی گپتگ بلے ھواریں جرمکار نہ گپتگ اَنت –

کھول ءَ لاش زرتگ ءُ لیویز پورس تھانہ ءِ دیم ءَ نندانک جتگ ءُ واکداراں چہ جرمکارانہ دزگیر کنگ ءِ دزبندی کتگ –

نصروئی راجی اتھاد ءِ بنجاھی جارکش ءَ گوشتگ کہ گوستگیں روچ ءَ عبدالمالک نصروئی ریکی آوار جنگ بیتگ ءُ چریشی ءَ پد ارزی ھم نبشتگ کنگ بیتگ ءُ مروچی سھب ءَ آوار جنی ءَ کارمرد بیتگیں گاڑی ءِ پجار ھم کنگ بیتگ ءُ چریشی ءَ پد عبدالمالک شھید کنگ ءِ ھال رس اِتگ-

آیاں گوشتگ کہ ناگ انتزامیہ پَٹ ءُ پول کنگ ءَ نہ اِنت ارزی نبشتگ کنگ بیتگیں مردمانی ناماں آیاں دزگیر بہ کنت بلے لیویز پورس ءَ گاڑی گپتگ بلے داں انگت ءَ لیویز پورس ءَ کس نہ گپتگ چریشی ءَ پد کھول ءُ ھمدرد ءُ نصروئی برادری ءَ میت زرتگ ءُ ناگ دگ بند کتگ ءُ نشتگ اَنت –

کھول ءِ لوٹ اِنت کہ انتزامیہ پٹ ءُ پول بہ کنت ءُ ایف آئی آر ءَ نام گپتیں مردماں دزگیر بہ کنت-