بانک کریمہ بلوچ ءِ اولی سالروچ ءِ درگت ءَ شال ءَ مراگشے برجم دارگ بیت اِنت – بی ڈبلیو ایف

بلوچ وومن فورم ءِ جارکش ءَ رسانکدراں وتی شنگ کرتگیں درشان ءِ تہ ءَگوشتگ کہ بلوچ زالبول ھر چاگرد ءِ اھمیں بھر انت – کہ چاگرد ءِ بدلیانی تہ ءَ وتی کرد ءَ پیلو کن انت – بلے نوک آبادی چاگرد ءِ تہ ءَ زالبول ءُ دومی طبقہ ءَ سیادی داروکیں مردماں چاگرد ءِ دیمروئی پہ ساچشتی کارانی تہ ءَ وتی کرد پیلو کنگے ھاتر ءَ آھانی دیم ءَ اڈاند پیدا کنگ بیت انت –

جارکش ءَ گوشتگ کہ بلوچستان ءِ تہ ءَ ھپتاد سالاں ھر تکاں بلوچ زالبولانی ناکہ تھنا پدکنزینگے کوشست بوتگ بلکنہ وڈ وڈیں ھنر پندلاں ٹکی نزام ءُ مزھبی انتہا پسندی نام ءَ آھانی پُشت ءَ دارگے کوشست بوتگ – بلے ھمے جاورھالاں بلوچ سرڈگار ءَ کریمہ بلوچ ءِ وڈیں شیرزال ءِ ودی کتگ – کہ آئی ءَ چاگرد ءِ تہ ءَ بلوچ زالبول دیم ءَ آھگ ، تمردی ءُ جزبگاں گوں وتی راجی ءُ چاگردی زمہ واریانی پیلو کنگے ھوسلہ بکشتگ –

جارکش ءَ دیمتر ءَ گوشتگ کہ بلانک کریمہ بلوچ دلیریں زالبول ءِ بوتگ کہ آئی ءَ نگیگیں جاورھالانی تہ ءل ھنچیں دمگ ءَ وتی گام ڈن ءَ جتگ انت کہ اودا زالبولانی ڈن ءَ درآھگ ءَ چاگرد ءِ تہ ءَ دگہ نگاہ ءَ چارگ بوتگ انت – بلے بانک کریمہ ءَ دلیری ءِ گوم ءَ ناکہ تھنا راجداری ءِ تہ ءَ وتی نام کمائینتگ ءُ راجی ءُ انسانی زمہ واری پیلو کتگ انت بلکنہ وتی قابلیت ءُ صلاحیتاں نگیگیں جاورھالانی تہ ءَ نودربر راجکاری ءِ سرکماشی کتگ –

بلوچ وومن فورم ءِ جارکش ءَ دیمتر ءَ گوشتگ بانک کریمہ ءِ راجکاری جُھد ءَ بلوچ زالبولانی تہ ءَ وتی کرد پیلو کنگے زانت داتگ – مروچی بلوچ چاگرد ءِ تہ ءَ ھر زالبول ءِ راجکاری یا چاگرد ءِ تہ ءَ وتی کرد ءَ پیلو کنگ انت آ بانک کریمہ ءِ راجکاری کرد ءِ مرہون منت انت –

جارکش ءَ وتی درشان ءِ گڈسر ءَ گوشتگ کہ بانک کریمہ بلوچ ءِ کرد بلوچ زالبولانی ھاتر ءَ روکیں چراگ ءِ مانند انت آئی ءِ جھد بلوچ چاگردے تہ ءَ ھچبر بیھال کنگ نہ بنت – بلوچ وومن فورم آئی ءِ اولی سالروچ ءَ آئی ءَ سھریں دروت ندر کنت ءُ شال ءَ آئی ءِ نام ءَ مراگش ءِ اڈ دئیگ بیت اِنت –