نیشنل ڈیموکریٹک پارٹی ءِ نیمگ ءَ چہ کرینمل لاء آرڈیننس سیاھیں کانون گوشتگ کہ گورنر بلوچستان اُستانی پتر سیشن بوگ ءَ چہ ابید آرڈیننس شنگ کنگ اسمبلی ءِ آجوئی لیکہ ءِ سر ءَ گٹگیری اَنت – کہ ریاست پاکستان ءِ راہ راھبندانی ھم ھلاپ ورزی اِنت-
جارکش ءَ گوشگ کہ ریاست پاکستان ءِ راہ ءُ راھبند آرٹیکل 16 ءِ رِد ءَ ھر مردم مچّی کنگ ءِ ھک اِنت ءُ ھمے وڑ راہ ءُ راھبند آرٹیکل 19 ءَ رِد ءَ ھرچ شھری ءِ وتی ھیال لیکہ درشان کنگ ھک اِنت – بلے گورنر بلوچستان ءِ نیمگ ءَ چہ کریمنل لاء آرڈیننس شنگ کنگ دگانی سر ءَ مُچی ، مچی ءُ زھرشانیانی سر ءَ پابندی جنگ – کہ سر ءَ سر ریاست پاکستان ءِ راہ راھبندانی ھلاپ ورزی اِنت-
جارکش ءَ دیمتر ءَ گوشتگ کہ بلوچستان ءَ بندات ءَ چہ ریاستی زُلم ءُ زوراکی ءِ ساھگ ءِ چیر ءَ ایں ، بازیں مدتے ءَ چہ بلوچ راج ءِ ورناہ ، کماش ، زھگ ، زالبول نہ رک اِتگ اَنت ، ھمے ھاتر ءَ بلوچ اے زُلم ءُ زوراکی ءِ بگیر ءَ ، کُشت ءُ کوش ، زورانسری آوار جنی ءِ بگیری ءَ دگانی سر ءَ زھرشانی کن اَنت بلے اے آرڈیننس ءَ سبب ءَ اے وڑیں سرجمیں زھرشانی ءُ روانکانی سر ءَ پابندی جنگ ءِ متلب اش اِنت کہ بلوچاں ھوار ایردستیں راج وتی ھک ، بؤکیں زُلم ءُ زوراکی ءِ بگیر ءَ توار چست کنگ ءِ دارگ اِنت-
جارکش ءَ وتی درشان ءَ گوشتگ کہ ما ھمے سرپد بہ ئے کہ اے وڑیں آرڈیننس کہ سیاھیں کانون اِنت آ بلوچ راج ءَ وتی ھکّانی ءُ آیانی سر ءَ بؤکیں زُلم ءُ زوراکی ءِ زورگر ءِ بگیر ءَ چست کنوکیں تواراں ایرموش کُت نہ کن اَنت ءُ ھمے وڑیں آرڈیننس مارا ھچ وڑ کبول نہ اَنت ، بلے اے ساڑی ئیں تاکتاں لوٹ اِیت آ اے سیاھیں قانون ( کریمنل لاء ) زوت ءَ زوت ءَ یک کر بہ کن اَنت – اگاں ناں گُڑا ما اشی ءِ بگیر ءَ ھرچ فورم ءَ توار چست کن ایں-