مکران ٹرانسپوٹراں پولیس رویش ءِ بگیری ءَ شال کراچی شاھدگ ءِ سر ءَ زھرشانی کتگ

مکران ءَ چہ کراچی ءَ رؤکیں کوچانی ڈرائیور ءُ ھُدابنداں ھب پولیس ءِ رویش ءِ بگیری ءَ لک بدو ھب ءِ دمگ ءَ زھرشانی کتگ، آھاں شال کراچی ءِ شاھدگ ءِ زھرشانی کتگ ءُ دگ بند کُتگ –

لک بدو ءَ زھرشانی سوب ءَ ھب ریوڑد دگ ءِ سر ءَ گاڑیانی رؤگ آھگ بند بوتگ، چریشی ءَ مساپر ءُ دگہ دمگاں چہ ھب ءُ کراچی ءَ آؤکیں نادراھاں ھم بازیں اڈءُجنجالانی دیمپانی بوتگ –

مکران ءِ ٹرانسپورٹرانی ھدابند ءُ انتزامیہ ءِ میان ءَ تنی وھدی ھچ وڈیں گند نند نبوتگ چریشی ءَ کوچ ڈرائیور ءُ ھدابنداں دگ ءِ سر ءَ اڑ ءُ جنجال پیدا کتگ ءُ نشتگ انت –

زانگ بہ بیت گوستگیں روچ ءَ پنجگور ءَ چہ کراچی ءَ آؤکیں کوچ ءِ تہ ءَ ھب ءِ پولیس ءَ نشہ گپتگ چہ آئی پد پولیس ءَ کوچ ءِ ڈرائیور دزگیر کتگ –

بلے ٹرانسپورٹ ءِ ھدابندانی گوشگ انت پولیس رویش مکران ٹرانسپوٹرانی گوما مدام ھمے وڈ اِنت – آھانی گوشگ ات کہ ھب ءِ پولیس ایس ایچ او عطاء اللہ نعمانی بگوشیت کہ آ چوں سرپد بوتگ کوچ ءِ تہ ءَ نشہ ھست بلے راستی اے پولیس ءِ وتی کتکاری انت –

گڈی ھالانی رد ءَ شال کراچی شاھدگ سر ءَ تنی وھدی مکران ٹرانسپوٹرانی نیمگ ءَ زھرشانی برجاہ انت ءُ تنی وھدی انتزامیہ ءِ اے درگت ءَ ھچ وڑیں گپ نہ داتگ –