بی ایس او ءِ بیست ءُ دومی کونسل سیشن ءِ گچین کاریاں چیئرمین چنگیز بلوچ، جنرل سیکریٹری اورنگزیب بلوچ گچین کنگ بیتگ اَنت-
سربیتگیں ھالانی رد ءَ بلوچ اسٹوڈنٹس آرگنائزشن ءِ بیست ءُ دومی بنجاھی کونسل سیشن شھید ھانی بلوچ ءِ یات ءَ 26 ءُ 27 نومبر شال ءَ گوں سوبمندی برجاہ دارگ بیتگ۔ بی ایس او ءِ بیست ءُ دومی بنجاھی کونسل سیشن بی ایس او چئیرمین ظریف رند ءِ پاگواجھی ءَ بیتگ۔
بنجاھی کونسل سیشن ءَ کارگشاد ءِ رپورٹ، میان اُستمانی ءُ راجی ردءَ ، گل ءِ جیڑہ ءُ دیمتر ءِ گامگیجی بنگپانی سر ءَ پُریں باوست کنگ بیتگ ءُ پہ دیمترے گامگیج ءَ شوربندی بیتگ۔
بی ایس او ءِ بیست ءُ دومی کونسل سیشن ءَ نوکتریں گچین بیتگیں بنجاھی اگدہ دارانی گچین کاری کنگ بیتگ کہ اِشی رد ءَ بنجاھی چیئرمین چنگیز بلوچ، مزن کمک چیئرمین جیئند بلوچ، کسان کمک چیئرمین شمس بلوچ، بنجاھی کارگشاد اورنگزیب بلوچ، مزن کمک کارگشاد خلیفہ بلوچ، کسان کمک کارگشاد شیرباز بلوچ وھدیکہ بنجاھی انفارمیشن سیکریٹری فرید مینگل گیچین کنگ بیتگ اَنت۔
بی ایس او ءِ فیسبوک تاک ءَ شنگ بیتگیں درشان ءِ رد ءَ نوک گچین بیتگیں اگدہ دارانی سوگند بیڑھی دیوان مروچی (28 نومبر) ءَ شال پریس کلب ءَ بیت اِنت۔ ءُ شپ ءَ نھ بج ءَ نوری نصیر خان آڈیٹوریم ءَ یک آشوبی دیوان ءِ اڈ دیگ بیت اِنت۔