بلوچستان ءَ تیرگواری ءُ دگ ءِ وئیلاں شش مردم زدگ ءُ یکے بیران

سربوتگیں ھالانی رِد ءَ بلوچستان ءِ دمگ پنجگور ءُ ڈیرہ بگٹی ءَ تیرگواری ءَ یک مردم ءِ بیران ءُ یکے زدگ بیتگ وھدیکہ بسیمہ ءُ وندر ءَ دگ ءِ وئیلاں پنچ مردم زدگ بوتگ –

گیشیں ھالانی رِد ءَ بلوچستان ءِ دمگ پنجگور ءَ ناشناسیں مردمانی تیرگواری ءَ یک مردم ءِ بیران بوتگ – بیران بوتگیں مردم ءِ پجار ارشاد ءِ نام ءَ چہبوتگ –

اھوالکار ءِ رِد ءَ وئیل چتکان بازار ءَ دیم ءَ اتکگ کُشندہ گاڑی ءِ سوار بوتگ اتکگ انت مرد ءِ تیر باران کُتگ کُشتگ –

دمگی پولیس ءَ جون دست گپتگ ءُ نادراھجاہ ءَ سر کتگ ءُ اودا اژدری چار ٹپاس ءَ پد کھول ءِ ھوالگ ءَ داتگ –

دگہ یک تیرگواری ءِ وئیل ءِڈیرہ بگٹی ءِ دمگ جروار ءَ دیم ءَ اتکگ کہ ناشناسیں مردمانی تیرگواری ءَ یک مردم ءِ زدگ بوتگ – زدگ بوتگیں مردمنادراھجاہ ءَ سر کنگ بوتگ –

دومی نیمگ ءَ دگ ءِ وئیل ءَ سَے مردم زدگ بوتگ –

وئیل وندر ءِ دمگ ساند ءَ دیم ءَ اتکگ کہ دو پرپٹانی ڈیک ورگ ءَ سَے مردم زدگ بوتگ – زدگ بوتگیں مردمانی پجار مبارک جاموٹ،  ناصر بلوچءُ نورداد ءِ ناماں چہ بوتگ انت –

ویلفئیر ٹرسٹ ءِ مردماں زدگ بوتگیں مردم دست گپتگ ءُ جام غلام قادر نادراھجاہ ءَ سرکتگ انت –

دگہ وئیل ءِ بسیمہ ءَ دیم ءَ اتکگ کہ گاڑی ءِ چپی بوھگ ءَ دو مردم زدگ بوتگ انت – 

وئیل بسیمہ ءِ دمگ قیصر آباد ءِ نزیک ءَ ھما وھد ءَ دیم ءَ اتک کہ مردم نوشکی ءَ چہ پنجگور روگ ءَ بوتگ انت –

زدگ بوتگیں مردم ھما دمان ءَ بسیمہ نادراھجاہ ءَ برگ بوتگ انت وئیل ءِ آماچ بوتگیں مردمانی سیادی چہ نوشکی ءَ اِنت ءُ وئیل تیز روگے سوب ءَدیم ءَ اتکگ –