ھوشاپ ءَ زھگانی کوش: تربت ءَ نودربرانی نیمگ ءَ زھرشانی روانک

بلوچستان ءِ دمگ کیچ ءِ بنجاھی شھر تربت ءَ یونیورسٹی آف تربت ءِ نودربراں ھوشاپ وئیل ءِ ھلاپ ءَ زھرشانی ءُ روانک کش اِتگ –

روانک ءَ نودربراں بازیں کچے ءَ بھر زرتگ ءُ روانک ءَ آیانی دستاں بینر ءُ ھوشاپ ءَ کشگ بیتگیں زھگانی بارو ءَ نبشتگیں تاک دست ءَ بیتگ اَنت کہ آیانی سر ءَ انساپ ءِ لوٹ نبشتگ بیتگ اَنت –

آیانی گوشگ اِنت کہ اے زُلم نِی بلوچستان ءَ دراج کش بیتگ اَنت ھما ھساب ءَ کہ پیسر ءَ ورنا کشگ بیتگ اَنت نِی مئے زھگاں کشگ ءُ مارا گار کنگ ءَ اَنت –

آیانی گوشگ اَت کہ بلوچستان ءِ جاور ھما ھساب ءَ بیتگ اَنت کہ اد ءَ زھگے ھم وتی ایمنی ءَ تر اِت کنگ ءَ نہ اِنت کہ وھد ھما ھساب ءَ رس اِتگ اَنت کہ کس ءَ بے توار بیگی نہ اِنت –

زانگ بہ بیت دَہ اکتوبر ءَ ھوشاپ پرکوٹگ ءَ ایف سی ءِ تیرگواری ءَ دو زھگ بیران بیتگ اِت اَنت –

زھگانی بیرانی ءَ پد یک رندے پد ءَ بلوچستان ءِ تہ ءَ زھرشانیانی لڑ گیشی ءِ ھساب ءَ گندگ ءَ آیگ ءَ اَنت –

سیاسی ءُ چاگردی گلانی گوشگ اِنت کہ بلوچستان ءِ جاورانی ناگیگ کنوک ایف سی اِنت باید ایف سی کشگ بہ بیت اِنت –

دومی نیمگ ءَ بلوچستان ءِ بنجاھی شھر شال ءَ مروچی دومی روچ ءَ ھوشاپ ءَ کشگ بیتگیں زھگانی لاشانی ھواری ءَ کھول زھرشانی نندانک ءَ نشتگ ءُ چریشی ءَ جتا جتائیں گل ءُ پھناتاں بندوکیں مردم زھرشانی نندانک ءَ آیگ ءُ کھول ءِ گون ءَ پدردی درشان کنگ ءَ اَنت –

ھمے وڑ بلوچ یکجھتی کمیٹی کراچی ءِ نیمگ ءَ ھم باندا کراچی پریس کلب ءِ دیم ءَ زھرشانی ءِ جار پِرینگ بیتگ اَنت ءُ ھمے وڑ گوادر ءَ ھم زھرشانیانی جار پِرینگ بیتگ اَنت –

مروچی دومی روچ ءِ نندگ ءَ پد ھم بلوچستان ءِ بنجاھی شھر شال ءَ اسرمندیں کھولانی گون ءَ گپ ءُ رپ ءَ سرکاری واک نیتکگ اَنت –