اوگانستان ءِ پرگینگ نمروز ءَ سلاہ بندیں مردماں اُرش کُتگ ءُ دو بلوچ پناگیر ٹپی کُتگ اَنت۔
راج دوستیں گل بلوچ ریپبلکن پارٹی ءِ بنجاھی جارکش شیر مھمد بگٹی ءَ رسانکدر ءَ شنگ کُتگیں کسانیں درشانے ءِ تہ ءَ گُشتگ کہ پاکستانی چیریں گلانی کارمنداں اوگانستان ءِ شھر نمروز ءَ بگٹی پناگیرانی سرءَ اُرش کُتگ۔ اُرش ءِ سوب ءَ دو مردم ٹپی بیتگ اَنت۔
آئی ءَ گُشگ اَت کہ ما اوگانستان ءِ انیگیں سرکار ءَ چہ لوٹ کنیں کہ آ پناگیرانی پھازگ ءَ باوری بہ کن اَنت، اے اُرش بلوچ ءُ پشتون ربیدگانی ھلاپ اِنت۔
زانگ بہ بیت اے اولی وئیل نہ اِنت کہ اوگانستان ءَ بلوچ پناگیر نشانگ کنگ بیتگ اَنت چہ اِشی ءَ پیسر ھم بلوچ پناگیر اوگانستان کندھار پرگینگ ءَ نشانگ کنگ بیتگ اَنت۔
ھمے سال ءَ اپریل ءِ ماہ ءَ اوگانستان ءِ سیمسری دمگ اسپین بولدک ءَ سلاہ بندیں مردماں تیر گواری کُتگ اَت ءُ چار بگٹی پناگیر کُشتگ اِت اَنت، جنگ بیتگیں مردمانی پجار غلام نبی ء ترونگ علی بگٹی، جنگی ء درمان بگٹی، سکا ء دین مھمد بگٹی ءُ امیر جان ءُ روستم بگٹی ءِ نام ءَ بیتگ اِت اَنت۔
چہ اِشی ءَ پیسر گوستگیں سال ءَ 20 دسمبر ءَ کندھار شھر ءَ سلاہ بندیں مردمانی تیرگواری ءَ دو بگٹی پناگیر بیران بیتگ اَت کہ اشانی پجار گل بھار بگٹی ءُ آئی چُک مراد علی بگٹی ءِ نام ءَ بیتگ اَت۔
اوگانستان ءِ جتاھیں دمگانی تہءَ اے وھدءَ بلوچستان ءَ چہ لڈاتگییں ھزارانی کچ ءَ پناگیر جھمنند اَنت۔
گوستگیں روچانی تہءَ یک نیمگ ءِ پاکستانی پوج ءَ بلوچستان ءِ تہءَ مزنیں کساس ءَ بیڑ برگ بندات کُتگ ھمے ردءَ دومی نیمگ ءَ چہ بلوچستان ءَ ڈن سیاسی جھدکار ءُ بلوچ جُنز ءِ دوزواھاں نشانگ کنگ ءَ اَنت۔