شال ءَ میڈیکل نودربرانی دزگیری ءِ ھلاپ ءَ تربت ءَ زھرشانی

بی ایس او پجار ءَ پاکستان میڈیکل کمیشن ءُ شال ءَ میڈیکل نودربرانی دزگیری ءِ ھلاپ ءَ تربت ءَ روانک، شھید فدا چوک ءَ زھرشانی کتگ –

آل پارٹیز کیچ ءُ تربت سول سوسائٹی ءَ زھرشانی ءِ پلامرزی کتگ –

شال ءَ میڈیکل انٹری ٹیسٹ ءِ پژدر ءَ نودربرانی سر ءَ پولیس ءَ لَٹ شاپ ءُ دزگیریاں ھوار پی ایم سی ءِ تلبداری ءِ ھلاپ ءَ تربت ءَ بی ایس او پجار ءُ بی ایس او ءِ چیردستی ءَ عطا شاد ڈگری کالج تربت ءَ داں شھید فدا چوک ءَ روانک ءُ زھرشانی کنگ بیتگ –

زھرشانی ءَ تران کنان ءَ بی ایس او پجار ءِ بنجاھی وائس چیئرمین بوھیر سالہ، بی ایس او ءِ بنجاھی جوئنٹ سیکرٹری ظفر رند، آل پارٹیز کیچ ءِ کنوینر مشکور انور ایڈوکیٹ، تربت سول سوسائٹی ءِ کنوینر کامریڈ گلزار دوست، بی ایس او ءِ بنجاھی پتر ءِ باسک خلیفہ برکت، نوید تاج ءُ عابد عمر ءَ گوشتگ کہ پاکستان میڈیکل کمیشن ءَ ٹپس نامیں ادارھے ءِ زور ءَ آن لائن ٹیسٹ کتگ بلوچستان ءِ نودربرانی گون ءَ ناھکی کتگ – بلوچستان ءَ آن لائن ٹیسٹ ھلاس کنگ بہ بنت ءُ فزیکلی ٹیسٹ کنگ بہ بنت دانکہ میڈیکل ءِ نودربراں دگہ جیڑہ درپیش مہ بیت اِنت-

آیاں گشتگ کہ استانی بنجاھی سرکار ءَ پولیس ءِ زور ءَ نودربر جتگ اَنت اے استانی سرکار ءِ نابودی زاھر کتگ –

آیاں گشتگ کہ بلوچستان ءِ سر ءَ نابودیں سرکار مُشگ بیتگ کہ نودربراں ھوار دراھیں پھناتانی مردم بزگ اَنت، سرکار آسراتی ءِ دیگ ءَ سرجم ءَ بے سوب بیتگ –

آیاں گشتگ کہ نودربرانی سر ءَ لَٹ ءُ کُٹ منگ نہ بیت اِنت، ھپتاد ءُ پنچ زھرشانی کنوکیں نودربرانی دزگیری سرکار ءِ نالائکی اِنت –

آیاں گشتگ کہ سرجمی ءَ دزگیر کرتگیں نودربر یلو کنگ بہ بنت ءُ دروگیں ارزی کشگ بہ بنت اگاں ناں گڑا بی ایس او اد ءَ دراھیں پاٹیانی ھواری ءَ ترندیں زھرشانی کنت –