تربت: شال ءَ نودربرانی سر ءَ زوراکی ءِ ھلاپ ءَ تربت ءَ زھرشانی

بلوچستان ءِ دمگ کیچ ءِ بنجاھی شھر تربت ءَ بلوچ اسٹوڈنٹس ایکش کمیٹی تربت یونیورسٹی بنزہ ءِ نیمگ ءَ پاکستان میڈیکل کمیشن ءِ بے رھبندی ءُ شال ءَ نودربرانی سر ءَ زوراکی ءِ ھلاپ ءَ روانک کش اِتگ –

زھرشانی ءَ زھرشانی کنوکانی دستاں نبشتگیں تاک ءُ دگہ بینر بیتگ اَنت آیانی سر ءَ کمیشن ءِ بے رھبندی ءُ نودربرانی سر ءَ زوراکی نبشتگ بیتگ اَنت-

روانک ءَ بھر زیروکیں مردماں گُشتگ کہ ناشر ءُ وانگ دشمنیں پالیسی ھچ رنگ ءَ منّگ نہ بنت ءُ نودربرانی سر ءَ زُلم ءُ زوراکی ایرجنگی اِنت ءُ نودربرانی جیڑہ ءِ گشینگ ءَ داں جد ءُ جھد برجاہ بیت اِنت –

زانگ بہ بیت گوستگیں روچاں شال ءَ نودربرانی نیمگ ءَ یکشل ءَ زھرشانی ءُ نندانک برجاہ اَنت ءُ کہ گوستگیں شپ ءَ نودربر دو بر لَٹ ءُ کُٹانی نشانگ کنگ ءُ بازیں کچے ءَ دزگیر کنگ بیتگ اَنت-

مروچی داں انگت ءَ شال ءِ پریس کلب ءِ دیم ءَ زھرشانی نودربرانی زھرشانی نندانک برجاہ اِنت ءُ نودربراں ھوار بازیں کچے ءَ جتا جتائیں پھناتاں بندوکیں مردم اے نندانکی زھرشانی ءَ ھوار اَنت –

آیانی گوشگ اِنت کہ اے زھرشانی نندانک ھما وھد ءَ داں برجاہ بیت اِنت کہ گپتگیں نودربر یلو نہ بنت ءُ نودربرانی لوٹ سرجم کنگ نہ بنت –

ھمے رنگ ءَ کیچ ءَ بی ایس او ءُ بی ایس او پجار ءِ نیمگ ءَ بیست ءُ پنچ ستمبر ءَ زھرشانی روانک ءِ جار پِرینگ بیتگ اَنت-

آیاں سیاسی ءُ چاگردی مھلوک ءَ چہ لوٹ کرتگ ءُ گوشتگ کہ آ بیست ءُ پنچ ستمبر سھب ءِ ساھت یازدہ ءَ اے زھرشانی روانک ءَ بھر بہ زور اَنت ءُ نودربرانی واستا وتی ھمگرنچی ءِ منانک ءَ بہ دے اَنت –