پسنی کوسٹ گارڈ دریا وردانی لانچانی پچگرگ ءِ بیھار

پاکستان کوسٹ گارڈ ءَ پسنی ءِ زری دمگ کٹاؤ ءَ چہ دریا ورداں لانچانی کشگ ءِ زبانی ھکم داتگ، ھمے گوشگ بوتگ کہ اگاں دریا ورداں وتی لانچ اد ءَ چہ درنہ کت اَنت گڑا دستیگ کنگ بنت –

دریا ورداں زھرشانی کنان ءَ وت ءَ پسنی ءِ اسسٹنٹ کمشنر ءِ کارگس ءَ سر کُتگ پسنی جیٹی ءَ ھاک ءِ آیگ ءَ پد دریا ورد وتی لانچ ءَ زری دمگ کٹاؤ اوشتارین انت –

دمگی مردماں لوٹ کتگ کہ اے دمگ پاکستان کوسٹ کارڈ مِلک نہ ایں بے وجہ ءَ دریا ورداں تنگ مہ کنت –

پسنی ءِ دریاورداں پاکستان کوسٹ گارڈ زبانی ھکم بگیری ءَ زھرشانی کنان ءَ مروچی اسسٹنٹ کمشنر محمد عارف زرکون ءِ کارگس ءَ شُتگ انت –
دریاوردانی رِد ءَ پسنی ءِ فش ہاربر جیٹی ءِ بندش جنگ ءَ پد دریاورد وتی کسانیں لانچاں پسنی ءِ شمال ءَ کٹاؤ نامیں جاھے ءَ اوشتارین انت ءُ ھمد ءَ چہ شکار ءِ واستا درکائنت بلے گوستگیں دو روچ انت کہ پاکستانی کوسٹ گارڈ ءِ نیمگ ءَ آ گوشگ بوگ ءَ انت کہ وتی لانچاں اد ءَ چہ در بہ کن انت اگاں در نکوتاں دستیگ کنگ ءِ زبانی ھکم داتگ –

دریا وردانی رِد ءَ اے جاہ پاکستان کوسٹ گارڈ ءِ نہ ایں اد ءَ نزیک ءَ پاکستان میرین سیکورٹی ایجنسی ءِ بنجل ھست انت بلے ایم ایس اے نیمگ ءَ دریا ورد ھچ گوشگ بوگ ءَ نہ انت –

دریا وردانی رِد ءَ پاکستانی کوسٹ گارڈ بے وجہ ءَ آھانی گوم ءَ ترندی ءَ پیش ایگ انت – آھانی رِد ءَ پاکستانی کوسٹ گارڈ اھاں کاشا ءِ تہ ءَ ھم ماھیگ شکار ءَ دارگ انت ءُ گوشگ انت کہ اے جاھاں ماھیگ ءِ شکار ءَ مہ کنیت –

دومی نیمگ ءَ پسنی ءِ دمگی مھلوک ءَ پاکستان کوسٹ گارڈ ءِ اے رویہ ایرجتگ ءُ گوشتگ کہ پسنی ءِ جاورھال پہ زور ھراب کنگ بوگ ءَ انت ءُ دریا ورد ترسینگ بوھگ انت – آھاں چہ بُرزی لشکری واک ءَ چہ لوٹ کتگ کہ پاکستانی کوسٹ گارڈ ءِ اے گیرکانودی ءُ بے رھبندی گامگیج بگیری ءَ آھانی اپسر جُست کنگ بہ بنت ءُ پسنی ءِ دریا ورداں بے وجہ ءَ تنگ کنگ ءَ بند بہ کن انت-