پنجگور ءَ تیرگواری، دو مردم بیران

بلوچستان ءِ دمگ پنجگور ءَ گوستگیں لھتے ماھاں یکشل ءَ تیرگواریانی وئیل برجاہ اَنت ءُ گوستگیں ھپتگ ءَ پت گوں دو چکانی ھواری ءَ ناشناسیں مردمانی دست ءَ کُشگ بیتگ اَنت ءُ مروچی تیرگواری ءُ دگہ دو مردم بیران بیتگ اَنت –

مروچی پنجگور ءِ دمگ غریب آباد ءَ تیرگواری ءِ وئیلے دیم ءَ اتکگ کہ تیرگواری ءِ وئیل ءَ بیران بیتگیں مردمانی پجار جلیل ء الاھی بکش ءُ علاوالدین ء اختر ناماں بیتگ اَنت کہ ھردوک پروم ءِ جھمنند گوشگ بیتگ اَنت –

دمگ ءِ نادراہ جاہ ءِ رد ءَ جلیل ھما جاہ ءَ بیران بیتگ ءُ علاولدین زدگ بیتگ ءُ نادراہ جاہ ءَ سر بیتگ ءُ آئی ءَ ساہ داتگ اَنت –

ھمے وڑ وڈھ ءَنکلی بن پیر مھمد ءَ ناشناسیں مردماں مھمد عالم نامیں مردمے ءِ لوگ ءِ سر ءَ بمبے چگل داتگ ءُ تتکگ اَنت بلے دگہ جانی تاوانانی ھال نہ بیتگ اَنت-

لیویز ءُ پھزدار وئیل جاہ سر بیتگ ءُ چم دیستگیں مردمانی یکجاہ کنگ اش بنا کتگ اِت –