مھراب پندرانی ءِ کوش ءِ وئیل: تربت ءَ زھرشانی بیتگ

بلوچستان ءِ دمگ کیچ ءِ بنجاھی شھر تربت ءَ پشمبے ءِ روچ ءَ سول سوسائٹی ءِ نیمگ ءَ مھراب پندرانی ءِ کوش ءِ ھلاپ ءَ پریس کلب ءِ دیم ءَ زھرشانی کنگ بیتگ –

زھرشانی ءَ جتا جتائیں پکرانی منوگرانی دستاں پلے کارڈز بیتگ اَنت کہ آیانی سر ءَ مھراب پندرانی ءِ کوش ءُ زرکاری ءِ نزام ءِ ھلاپ ءَ اوگام نبشتگ بیتگ اَنت-

ھمے وھد ءَ تران کنوکاں تران کنان ءَ کسان سالیں مھراب پندرانی ءِ کوش ایر جتگ ءُ انساپ ءِ لوٹ کرتگ –

آیاں گُشتگ کہ کوش ءَ ھواریں نامی دھشت المی ءَ گرگ ءُ کھول ءَ انساپ دیگ بہ بیت اِنت –

بلوچستان ءِ دمگ نسیر آباد ءَ سیادی داروکیں مھراب پندرانی ءِ ناگتی دزی ءِ بھتام ءَ لَٹ ءُ کُٹ کنگ ءَ پد کشگ بیتگ ءُ کھول ءِ نیمگ ءَ نامی ئیں ٹرانسپورٹر ھاجی ھکمت لھڑی ءِ سر ءَ کوش ءِ بھتام جنگ بیتگ –

گوستگیں روچ ءَ پاکستان ءِ بنجاھی شھر اسلام آباد، بلوچستان ءِ بنجاھی شھر شال ءَ مھراب پندرانی ءِ کوش ءِ ھلاپ ءَ روانک ءُ زھرشانی کنگ بیتگ اِت اَنت –

زھرشانی کنوکاں کوش ءِ بارو ءَ تچکیں اھوال ءُ جرمکارانی دزگیر کنگ ءُ سزا دیگ ءِ لوٹ کتگ اَنت –

تربت پریس کلب ءِ دیم ءَ زھرشانی ءَ پد سر بیتگیں ھالانی رد ءَ زھرشانی ءِ برجم داروکیں سول سوسائٹی ءِ کنوینئر گلزار دوست پولیس ءَ دزگیر کرتگ –

چاگردی رسانکجاھاں سر بیتگیں ھالانی رد ءَ پولیس ءَ گلزار دوست پانزدہ سال پیش مروچیگیں روچ نواب اکبر بگٹی ءِ کوش ءِ ھلاپ ءَ پروشت ءُ پروشیں زھرشانیاں دزمانجنی ءِ بھتام ءَ دزگیر کرتگ –

بلے دومی نیمگ ءَ تربت پولیس ءِ رد ءَ دوھزار ءُ ھپت ءَ سیلاپ زدگانی روانک ءَ پروشت ءُ پروشانی ھواری ءِ بھتام ءَ دزگیر کرتگ –

گڈی ھالانی تہ ءَ گُشگ بیتگ کہ گلزار دوست زمانت ءِ سر ءَ یلو کنگ بیتگ –