گوادر ءَ یک مردمے بیگواہ

بلوچستان ءِ تیاب دپی دمگ گوادر ءَ یک مردمے زورانسری آوار جنگ ءَ پد بیگواہ کنگ بوتگ –

گیشیں ھالانی رِد ءَ گوستگیں بیگاہ ءَ گوادر ءِ بنجاھی بازار ءَ لس مردمی پوشاکیں کارمنداں شعیب ء عزت آوار جتگ ءُ بیگواہ کتگ –

دی بلوچستان پتر ھال ءَ سربوتگیں ھالانی رِد ءَ شعیب ء عزت وتی دگہ سنگتانی ھمراہ بوتگ کہ گوستگیں بیگاہ ءِ ادار ھپت ءَ آوار جنگ بوتگ –

ٹی بی پی پتر ءَ سربوتگیں ھالانی رِد ءَ آوار جنگ بوتگیں شعیب بلوچ بی ایس او آزات ءِ گوستگیں سنٹرل کمیٹی ءِ باسک کامریڈ قیوم بلوچ ءِ گھارزتک انت –

کامریڈ قیوم بلوچ یازدہ دسمبر دوھزار ءُ دہ ءَ گوادر ءَ وتی ناکو ءِ گِس ءَ چہ آوار جنگ ءُ بیگواہ کنگ بوتگ پد ءَ رند ءَ سال دوھزار ءُ یازدہ ءِ دہ فروری ءَ آئی ءِ زانگولیں جون تربت ءِ دمگ ھیرونک ءَ یک دگہ بیگواھیں بلوچ سیاسی باسک جمیل یعقوب بلوچ ءِ ھمراھی ءَ دست کپتگ –

بلوچستان ءِ تہ ءَ سیاسی باسک ءُ نودربرانی زورانسری آوار جنی یکشل ءَ برجاہ انت ءُ بیگواھیانی بھتام ءَ پاکستان ءِ چیریں ادارھانی سر ءَ جنگ ءَ انت –

جرمنی ءَ نندوکیں بلوچ نیشنل مومنٹ ءِ رھشون شارحسن بلوچ ءَ ٹی بی پی ءَ گون ءَ تران کنان ءَ گوشت کہ آئی گھار زتک آئی ایس آئی ءِ کارمنداں آوار جتگ ءُ بیگواہ کتگ –

آئی ءَ چہ انسانی ھکانی ادارھاں گوں لوٹ کتگ کہ شعیب بلوچ ءِ یل کنائینگ ءَ وتی کرد ءَ پیلو بہ کن انت –