کابل: تالبان ءِ بگیری ءَ جنگ ءَ ساجو آں – احمد مسعود

کابل ءَ تالبان ءِ گرگ ءَ پد اوگانستان ءِ گوستگیں مجاھدین کماندار احمد شاہ مسعود ءِ زھگ احمد مسعود ءَ گُشتگ کہ من ءُ منی ھمراہ تالبان ءِ ھلاپ ءَ جنگ ءَ ساجو اِیں-

امریکی روتاک واشنگٹن پوسٹ ءَ گوں گپ کنان ءَ احمد مسعود ءَ نبشتگ کرتگ ’من مروچی وادی پنجشیر ءَ نبشتگ کن آں من وتی پت ءِ رندپداں روگ ءَ ساجواں ءُ یک رندئے پد ءَ تالبان ءِ ھلاپ ءَ جنگ کن آں ‘-

آئی ءَ گُشتگ کہ منی گور ءَ اینکس سلاہ ءُ دگہ جنگی ازباب ھست کہ من وتی پت ءِ زمانگ ءَ یکجاہ کنگ بندات کتگ اَنت ءُ من ءَ گمان بیتگ کہ اے وھد ءِ ناوشیں ھجلیں جاوراں کار ءَ کاینت –

پنجشیر اوگانستان ءِ سِی ءُ چارومی اُستاناں یکے کہ چہ کابل ءَ سَے ادارانی دوری ءَ اِنت اے اُستان گوست ءَ تالبان ءِ وھد ءَ نوزدہ سد ءُ نود ءُ شش ءَ بہ گر داں سال دوھزار ءُ یک ءَ تالبان ءِ دست ءَ نہ بیتگ ءُ شیر پنجشیر ءِ نام ءَ نامان اِنت-

گوشگ بیت اِنت کہ احمد شاہ مسعود ءِ چیردستی ءَ ناردن الائنس (شمالی اتحاد) تالبان ءِ ھلاپ ءَ ھمے دمگ ءَ جنگ اش کرتگ –

گوشگ بیت اِنت کہ مروچی تالبان ءَ اوگانستان ءِ دراھیں جاہ دستیگ کتگ اَنت بلے انگت ءَ پنجشیر تالبان ءِ دست ءَ نیتکگ –

گوشگ بیت اِنت کہ آئی ءِ ھمسنتیں اوگانستان ءِ کسان کمک سروک ءُ احمد مسعود ءِ کوھنیں سنگت امر اللہ سالہ اِنت کہ آئی ءَ اشرف گنی ءِ روگ ءَ پد آئی ءَ ٹوئٹر ءَ کلوہ داتگ کہ من اوگانستان ءِ رھبندانی ھساپ ءَ اوگانستان ءِ سروکاں –

آئی ءَ گُشتگ اَت کہ من ڈیھ ءَ جاڑیگاں کانودانی رد ءَ ڈیھ ءِ نگران سروکاں –

احمد شاہ مسعود ءِ زھگ ءَ وتی نبشتانک ءِ تہ ءَ گُشتگ کہ اوگانستان ءِ مزنیں آفسیرانی سلاہ چگل دیگ ءَ ناوش اِنت آ وتی سلاھانی ھواری ءَ پنجشیر ءِ کوھانی نیمگ ءَ روگ ءَ اِنت –

آئی ءَ گُشتگ کہ اے درست بس اَنت تالبان ءِ دیم ءِ دارگ ءُ تالبان ءِ سر ءَ مزنیں اُرش کُت کنت ءُ آ اے زور ءَ داشت کنت بلے بیت کنت اے سلاہ تالبان ءِ واستا کم اَنت –

احمد مسعود ءَ امریکا ءُ برطانیہ ءَ ھوار دگہ روکپتی ڈیھاں گوں کمک ءِ دزبندی کرتگ –

ھمے وڑ اوگانستان ءِ آجوئی ءِ واستا شاتمانی واستا اوگانستاج ءِ شھر اسد آباد ءَ کش اِتگیں روانک ءِ سر ءَ تالبان ءَ تیرگواری کرتگ ءُ دو مردم بیران بیتگ اَنت –