اوگان رسانکدر، میان اُستمانی ھالکار ءُ سربیتگیں ھالانی رِد ءَ گوریچی اوگانستان ءِ بازیں ولایتاں تالبان ءِ ھلاپ ءَ سِلاھبندیں آشوبی گل، راجدوست ءُ اوگان لشکر ءِ جنگی اُرش بُنگیج بوتگ اَنت۔
اوگانستان ءِ دیمانی کُمک وزیر پواد امن ءِ رِد ءَ راجدوست جنرل مارشل ابدلرشید دوستم ءِ سرپانی ءَ مزار شریپ، بلگ، کندوز ءُ دگہ بازیں گوریچی ولایتاں ناشرکاریں تالبان ءِ ھلاپ ءَ ٹوھیں جنگی اُرش بُنگیج بوتگ انت ءُ زیت گوریچی ولایت ءُ آیانی بُنجاھی شھر چہ تالبان ءِ دستگیری ءَ آجو بنت۔
زی کابل شھر ءَ راجی کارمستر اشرپ گنی ءِ پاگواجھی ءَ اوگان راجدوستانی یک بلاھیں مُچّی یے اڈ دیگ بیتگ اَت کہ ماں ایشی ءَ اتا تاجک راجدوست مھمد نور، اُزبک راج ءِ نامداریں راجدوست ءُ جنگی کماش مارشل ابدلرشید دوستم، راجدوست مھمد مھکیک، جھادی کماندار ابدلرسول سیاپ ءُ دگہ راجی سروکاں بھر زُرتگ اَت –
دومی نیمگ ءَ پہ تالبان ءِ ھلاپ ءَ جنگی مراسا ءُ تیاریانی چارگ ءَ زی راجی کارمستر اشرپ گنی گوں جھادی کماندار جُما ھان ھمدرد، مھمد مھکیک، مارشل ابدلرشید دوستم ءُ اتا مھمد نور ءِ ھمراھی ءَ وت بلگ ءِ بُنجاھی شھر مزار شریپ ءَ سربیتگ ۔
مرچی پد ءَ گوں دگہ دمگی جنگی سروگان ءُ کمانداراں یک نِند ءُ نیادے بیت۔ دومی نیمگ ءَ بلگ ولایت ءِ گورنر مھمد پرھاد آزمی ءَ گْوشتگ کہ مزار شریپ ءِ نزیکیں دمگ ءُ آتراپاں گوں راجی آشوبی گل ءُ جنگی بالیگُرابانی اُرشاں اوگان راجی لشکر ءَ ناشرکاریں تالبان ءَ پّروش داتگ ءُ زیت سرجمیں ولایت ءَ تالبان ءَ ٹوھیں پْروشے دیگ بیت۔
مرچی سُھب ءَ مارشل ابدلرشید دوستم ءَ گْوشتگ کہ ما اوگاناں مُدام پاکستانی کاسگ چٹّیں تالبان ءَ گوریچ ءِ ولایتاں پْروش داتگ ءُ تالبان مُدام تچگ ءَ سوبین بیتگ اَنت بلے اے وھدی پاکستانی کاسگ چٹّ چہ گوریچی ولایتاں تچگ ءَ سوبین نہ بنت بلکیں دْراہ بیڑترگ ءُ کُشگ بنت۔
دومی نیمگ ءَ اوگانستان ءِ لشکر ءَ وتی شنگ کرتگیں ھالانی تہ ءَ اوگانستان ءَ بیست ءُ چار ادارانی تہ ءَ 439 تالبانانی کُشگ ءُ 77 ٹپی بیگ ءِ ھال شنگ کرتگ اَنت-
اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 439 تالبان جنگول کُشتگ اَنت ءُ دِگہ 77 ٹپی کرتگ اَنت۔
راجی دیمپانی ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش ولایت نگرگار، لوگمان، لوگر، پکتیا، اُرزگان، زابُل، گوھر پراہ، بلگ ھِلمند، کاپیسا ءُ بلگان ءِ ھند ءُ دمگاں کرتگ اَنت۔
راجی دیمپانی ءَ وتی یکشلیں ٹیوٹر پیگاماں گیشتریں سرپدی یے دیان ءَ گْوشت کہ ولایت ھِلمند ءِ بُنجاھی شھر لشکرگاہ ءُ آئی ءِ نزیکیں دمگاں اوگان راجی لشکر ءِ جنگی بالیگُرابانی بمب گْواری ءُ راجی لشکر ءِ جنگی اُرشاں 42 ناشرکاریں تالبان جنگول کُشگ بیتگ اَنت ءُ دِگہ 6 ٹپی بوتگ اَنت۔
آئی ءَ شنگ کرتگیں ھال ءَ گُشتگ کہ اے اُرشاں تالبان ءِ بازیں جنگی سلاہ ءِ کوت ھم تباہ کنگ بوتگ اَنت، ولایت کندھار ءِ کُوچّگاں ھم اوگان راجی لشکر ءِ بالیگراباں جنگی اُرش کنان ءَ ناشرکاریں تالبان ءِ 25 جنگول کُشتگ اَنت ءُ دِگہ 13 زدگ کُتگ اَنت، اے اُرشاں تالبان ءِ 29 ٹوھیں سِلاہ، جنگی ساز ءُ سامان ھم تباہ کنگ بوتگ اَنت۔
زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشاں 361 تالبان جنگول کُشگ ءُ 145 ٹپی بیتگ اِت اَنت۔ اوگان راجی لشکر ءَ ھمے جنگی اُرش ولایت نگرگار، کُنر، لوگر، پکتیا، پکتیکا، میدان، واردک، کندھار، سرئے پُل، ھلمند، کندوز ءُ بلگان ءِ ھند ءُ دمگاں کرتگ اَت اَنت۔