سربوتگیں ھالانی رِد ءَ بیست ءُ چار ادارانی میان ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں نود ءُ چار دگہ نوکیں کیس دیم ءَ اتکگ اَنت ءُ اے وھد ءَ کرونا وائرس ءَ آماچ بوتگیں درسیں مردمانی کچ بیست ءُ نھ ھزار ءُ ھپت سد ءُ نود ءُ شش ءَ سر بوتگ اَنت-
بلوچستان ءَ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ بلوچستان ءَ بیست ءُ چار ادارانی میان ءَ نود ءُ چار مردماں کرونا نادراھی پدر بوتگ، کہ بلوچستان ءِ دہ دمگاں چہ پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ بیست ءُ نھ ھزار ءُ ھپت سد ءُ نود ءُ شش ءَ سر بوتگ اَنت- وش بوتگیں مردمانی کچ نوکیں کیساساں ھوار سرجمی ءَ بیست ءُ ھشت ھزار ءُ شش سد ءُ چل ءُ چار انت- تنی وھدی بلوچستان ءِ تہ ءَ کرونا وائرس ءَ سرجمی ءَ سَے سد ءُ بیست ءُ ھشت مردم بیران بوتگ انت –
رپورٹ ءِ رِد ءَ بلوچستان ءِ تہ ءَ گوستگیں روچ ءَ کرونا وائرس ءِ یک ھزار ءُ دو سد ءُ ھشتاد ءُ شش مردماں کرونا ٹیسٹ کنگ بوتگ، کہ دنیگتہ سَے سد ءُ چل ءُ چار مردمانی رپورٹ نہ اتکگ انت –
رپورٹ ءِ رِد ءَ بلوچستان ءِ تہ ءَ بیست ءُ چار ادارانی میان ءَ کرونا نادراھی گیش تالان بوگ ءِ ھپت ٹک سی ءُ یک درسد نبشتہ کنگ بوتگ –