بلوچستان ءَ دو جتا جتائیں وئیلاں دو مردم بیران بوتگ، یک لاشے دزکپتگ

سربیتگیں ھالانی رِد ءَ ھب چوکی ءَ کراچی ھاکس بے ءُ ھبکو پاور پلانٹ ءِ میانی ءَ یک ورنایے کور ءِ آپ ءَ جان شودگ وھد ءَ بُڈ اِتگ ءُ بیران بوتگ-

دمگی مردمانی رِد ءَ بیران بوتگیں ورنا ءِ پجّار اویس ء عبدلواحد ءِ نام ءَ چہ زانگ بوتگ ءُ لاش چہ آپ ءَ کش بوتگ ءُ ھب ءِ نادُراھجاہ ءَ سر کنگ بوتگ-

ھمے وڑ ھُزدار ءِ دمگ نال گریشگ بابلی ءَ الی ھسن ء نسیر اھمد ساجدی ءَ لوگی اڑ ءُ جیڑاھانی سوب ءَ شِزار بوتگ ءُ 28 جولائی ءِ بیگاہ لین ءِ کمبہ ءِ سر ءَ سر کپتگ یہ وتکشی کتگ ئِے-

لوگ مردمانی رِد ءَ الی ھسن ھژدہ سالی ئیں ورنایے بوتگ لوگی جیڑاھانی سر ءَ شِزار بوتگ ءُ 28 جولائی ءِ بیگاہ ءَ چہ لوگ ءَ در کپتگ ءُ ھمے گْوشتگ ئِے کہ من چہ وتی زند ءَ شِزاراں ءُ روگ آں وتکشی کنگ ءَ بلے آئی ءِ لوگ مردماں ورناہ الی ھسن ءِ گپ دیھان نداتگ اَنت-

ھمے وڑ گوستگیں روچ ءَ بلوچستان ءِ مستریں شھر ماں شال ءَ بی ایم سی نادُراھجاہ ءِ نزیک ءَ یک پجار نہ بوتگیں مردمے ءِ لاش دست کپتگ-

دست کپتگیں لاش ءِ پہ گیشیں پٹ ءُ پول ءِ ھاتر ءَ نادُراھجاہ سر کنگ بوتگ-