سربوتگیں ھالانی رِد ءَ بیست ءُ چار ادارانی میان ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں یک سد ءُ یک دگہ نوکیں کیس دیم ءَ اتکگ اَنت ءُ اے وھد ءَ کرونا وائرس ءَ آماچ بوتگیں درسیں مردمانی کچ بیست ءُ نھ ھزار ءُ شش سد ءُ چل ءُ دو ءَ سر بوتگ اَنت-
بلوچستان ءَ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ بلوچستان ءَ بیست ءُ چار ادارانی میان ءَ یک سد ءُ یک مردماں کرونا نادراھی پدر بوتگ، کہ آھانی تہ ءَ درساں گیش بلوچستان ءِ بنجاھی شھر شال ءَ بیست ،گوادر ءَ بیست ءُ ھشت ءُ تربت ءَ چِل ءُ یک مردمے کرونا وائرس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ بیست ءُ نھ ھزار ءُ شش سد ءُ چِل ءُ دو ءَ سر بوتگ اَنت- وش بوتگیں مردمانی کچ نوکیں کیساساں ھوار سرجمی ءَ بیست ءُ ھشت ھزار ءُ پنچ سد ءُ بیست ءُ پنچ انت- تنی وھدی بلوچستان ءِ تہ ءَ کرونا وائرس ءَ سرجمی ءَ سَے سد ءُ بیست ءُ ھشت مردم بیران بوتگ انت –
رپورٹ ءِ رِد ءَ بلوچستان ءِ تہ ءَ گوستگیں روچ ءَ کرونا وائرس ءِ ھشت سد ءُ ھپتاد چار مردم ءَ کرونا ٹیسٹ کنگ بوتگ، کہ دنیگتہ پنچ سد ءُ نود ءُ یک مردمانی رپورٹ نہ اتکگ انت –
رپورٹ ءِ رِد ءَ بلوچستان ءِ تہ ءَ بیست ءُ چار ادارانی میان ءَ کرونا نادراھی گیش تالان بوگ ءِ یانزدہ ٹک پنجاہ ءُ شش درسد بوتگ، وھدیکہ شال ءَ سَے ٹِک پنجاہ ءُ چار درسد رپورٹ بوتگ –