بلوچستان ءَ جتا جتائیں وئیلاں یک مردمے بیران، چار ٹپی، سَے جون دست کپتگ اَنت

سربوتگیں ھالانی ڈیرہ اسمائیل ھان، نوکنڈی، پنجگور ءَ جتا جتائیں وئیلاں یک مردمے بیران چار ٹپی بیتگ اَنت، وھدیکہ سَے جون دست کپتگ اَنت –

گیشیں ھالانی رِد ءَ بلوچستان ءِ دمگ پنجگور ءَ دگ ءِ وئیلے ءَ دو مردم ءِ ٹپی بوتگ انت –

ھالانی رِد ءَ وئیل چتکان ءَ ایپ سی کیمپ ءِ نزیک ءَ دیم ءَ اتکگ کہ گاڑی ءَ اوشتوکیں پرپٹ ءِ ڈیکر کتگ چریشی ءَ دو مردم ٹپی بوتگ ٹپی بوتگیں مردمانی پجار افضل ء شریف سراوان ءُ الاھی بکش ء ھیبتان ھاران ءِ ناماں چہ بوتگ انت – ٹپی بوتگیں مردم نادراھجاہ ءَ سرکنگ بوتگ انت –

ھمے وڑ دگہ وئیل ءِ پنجگور ءِ دمگ عیسی ءَ دیم ءَ اتکگ کہ اناگتی تیر لگگ ءِ سوب ءَ یک مردم ءِ بیران بوتگ – بیران بوتگیں مردم ءِ پجار مزمل ء عبدالقدیر ءِ نام ءَ چہ بوتگ کہ آ توپک ءِ ساپ کنگ ءَ بوتگ اناگتی توپک ءَ آس بُرتگ ءُ آئی ءَ لگ اتگ آ زدگ بوتگ – زدگی پد نادراھجاہ ءَ برگ بوتگ کہ اود ءَ آئی ءِ ٹپانی درد نہ سگ اتگ ءُ بیران بوتگ –

ھمے وڑ زھری ءَ ناشناسیں مردمانی تیر گواری ءَ یک مردمے ٹپی بوتگ – ٹپی بوتگیں مردم ءِ پجار عزیزاللہ لھڑی ءِ نام ءَ چہ بوتگ – ٹپی بوتگیں مردم نادراہ جاہ ءَ سر کنگ بوتگ –

دومی نیمگ ءَ ڈیرہ اسمائیل ءَ دریا ءِ سند ءَ سی آر بی سی کور ءِ نزیک ءَ دو مردم ءِ جون دست کپتگ اَنت –

ھالانی رِد ءَ یک جونے ءِ پجار مفتی محمود کہ آئی ءِ جون نادراھجاہ ءِ نزیک ءَ دست کپتگ ءُ دگہ جونے پرواگی ءَ سڑہ گرہ ءِ نزیک ءَ دست کپتگ – ھمے گوشگ بوگ ءَ انت کہ دومی جون شش ھپت روچ ساری ءِ انت کہ لٹ ءُ کٹ کنگ ءُ جنگ بوتگ – ھردو جون نادراھجاہ ءَ سرکنگ بوتگ انت –

ھمے وڑ نوکنڈی ءَ یک ماھے ءَ ساری ءِ جونے دست کپتگ – ھالانی رِد ءَ جون نوکنڈی ءَ ھشت کلومیٹر دور دست کپتگ، آئی ءِ پجار نبوتگ ھمے گوشگ بوگ ءَ انت کہ مرد افغان ءِ یا مھاجر بیت کنت – نوکنڈی پھازداراں وت ءَ جون ءِ کر ءَ سر کتگ جون زرتگ ءُ نادراھجاہ ءَ سر کتگ اود ءَ اژدری چار ءُ ٹپاس ءَ پد کھول ءِ نزانگ ءِ سوب ءَ وت کل کتگ –