شال ءَ بیگواھیں مردمانی درگیجگ ءَ زھرشانی برجاہ

راشد حسین ءِ لوگ ءَ بیڑ برگ ءُ کھول ءِ لَٹ ءُ کُٹ کنگ، باندا شال ءَ زھرشانی کنگ بیت اِنت – ماما قدیر بلوچ

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ بیگواھیں راشد حسین ءِ سیادانی لوگانی بیڑ برگ ءُ لوگ والایانی لَٹ ءُ کُٹ کنگ ءُ راشد حسین ءِ زامات ءِ زورانسری آوار جنی ایر جتگ اَنت –

اے گپ ماما قدیر بلوچ ءَ وی بی این پی ءِ زھرشانی بنجل ءَ کرتگ اَنت – بیگواھیں بلوچانی شوھازگ ءَ زھرشانی بنجل ءَ چار ھزار ءُ سَے سد ءُ نود ءُ پنچ روچ سرجم بیتگ – نیشنل پاٹی نصیر آباد ڈویژن ءِ سروک استاد عرض مھند عمرانی ءُ میر عبدالغفار قمبرانی ءَ بنجل ءِ تر ءُ تاب کرتگ –

ماما قدیر بلوچ ءَ گُشتگ اَت کہ بیگواھیں مردمانی کھولانی گون ءَ اے وڑیں رویش کنگ ءِ مول ایش اِنت آیانی زھرشانیاں دارگ لوٹ ایت اِنت – راشد حسین ءِ لوگ والایانی لَٹ ءُ کُٹ کنگ ءُ آئی ءِ سیادانی آوار جنگ ءِ ھلاپ ءَ وائس فار بلوچ مسنگ پرسنز ھرچ رنگ ءَ توار چِست کنت –

ماما قدیر بلوچ ءَ گُشتگ اَت راشد حسین ءِ لوگ ءِ سر ءَ بیڑ برگ ءِ ھلاپ ءَ باندا بزاں یکشمبے ءِ روچ ءَ سھت چار ءَ شال ءِ پریس کلب ءِ دیم ءَ زھرشانی کنگ بیت اِنت –

ماما قدیر بلوچ ءَ گُشتگ اَت کہ ایمنسٹی انٹر نیشنل ءُ میان اُستمان پاکستان ءَ بلوچستان ءَ ھستیں انسانی ھکانی پامالیانی جست ءَ بہ گپت اِنت –

ماما قدیر بلوچ ءَ گُشتگ اَت کہ شال ءَ دراھیں نودربر، سیاسی ءُ انسانی ھکانی باسکاں گوں دزبندی اِنت باندا سھت ء چار ءَ زھرشانی ءَ ھوار بہ بنت ءُ وتی بلوچیت ءُ انسانیت ءِ کرد ءَ پیلو بہ بکن اَنت –