اوگانستان ءِ لشکر ءَ اوگانستان ءِ دو ھندانی دستیگ کنگ ءِ ھال رسانکدران شنگ کرتگ

سر بیتگیں ھالانی رد ءَ اوگانستان ءِ لشکر ءِ تْرُندیں جنگی اُرش تالبان ءِ بگیری ءَ برجاہ اَنت، اوگانستان ءِ لشکر ءَ اوگانستان ءِ دو دمگ تالیکان ءُ گْوزراہ چہ تالبان ءِ دست ءَ آجو کنگ ءِ ھال رسانکدراں شنگ کرتگ اَنت –

اوگان راجی لشگر ءَ ولایت ٹکھر ءِ دمگ تالیکان ءُ ولایت ھِرات ءِ گْوزراہ ءِ دمگ چہ تالبان ءِ دست ءَ آجو کُتگ اَنت۔ اوگان پھزگی کارگس ءِ رِد ءَ اوگان راجی لشکر ءَ اُلسی سِلاھبندیں آشوب ءُ امریکی A-29 ءُ B52 جنگی بالیگرابانی تْرُندیں بمباری ءِ کُمک ءَ ولایت ھِرات ءِ ارزِشتیں دمگ گْوزراہ چہ ناشرکاریں تالبان ءِ دست ءَ آجو کُتگ۔ ھمے تْرُندیں بُرزی ءُ جھلی جنگ ءَ چہ 100 ءَ گیش ناشرکاریں تالبان ءِ جنگول کُشگ ءُ بازینے دزگِیر کنگ ءَ ھوار ایشانی سِلاہ ءِ کوت ھم تباہ کنگ بیتگ اَنت۔ اِے ھال ءِ راستی اوگان ءِ تھی کارانی کُمکّار واجہ پواد امن ءَ ھم داتگ۔

زانگ بہ بیت کہ ماھے ءَ پیسر اوگان تالبان ءُ بازیں پاکستانی سِلاھبندیں جنگولاں ھِرات ءِ ولایت گْوزراہ دزگِیر کُتگ اَت کہ آئی ءِ نزیکیں کِر ءَ ھندوستان ءِ پروجیکٹ سلمہ بند ھم ھست اَت، چہ وتگڑانی دست سلمہ بند ءِ وڑیں راجی آسراتی ءِ تباہ کنگ ءِ بیم ھست اَت کہ چہ ایشی ءَ ھرات ءُ نمروز ءِ بازیں شھرانی لائین ودی بوگ ءَ اِنت، سرجمیں ھرات ءُ نمروز ءِ ولایتاں کِشت ءُ کِشار ھم بیت۔

یات بہ بیت کہ امریکی جنگی سروک جنرل مکینزی ءَ چار روچ پیسر ءَ گْوشتگ اَت کہ امریکی لشکر پہ اوگان لشکر ءِ کُمک ءَ وتی تالبان ءِ سر ءَ وتی بالیگراب ءُ میزائیلانی اُرشاں یکشل ءَ برجاہ دار ایت ءُ ایشی ءَ پیسر ھِلمند ءِ دمگاں امریکی لشکر ءَ ھم اوگان تالبان ءِ سر ءَ جنگی اُرش کُت اَنت چریشی ءَ بازیں تالبان جنگول بیران بوت اَنت۔