کیچ: سَے براتاں ھوار شش مردم بیگواہ

بلوچستان ءِ دمگ چہ کیچ ءَ پاکستانی پوج ءَ سَے براتاں ھوار شش کس آوار جتگ ءُ ناشناسیں زنداناں برتگ اَنت –

سر بیتگیں ھالانی رد ءَ کیچ ءِ دمگ پُل آباد ءَ گوستگیں شپ ءَ یک لوگے ءَ پوج ءَ بیڑ برتگ ءُ اود ءَ چار کس دزگیر کنگ ءَ پد ناشناسیں جاھاں برتگ اَنت، کہ اشانی تہ ءَ سَے برات ءُ آیانی زامات ھوار اِنت کہ آیانی پجار شعیب، جنید، شے حق ء تاج مھمد ءُ گپور ءِ ناماں زانگ بیتگ اَنت –

دمگی مردمانی رد ءَ پوج ءَ گوستگیں شپ ءِ کساس ساھت سَے ءَ بیڑ برتگ ءُ لوگ ءَ جاڑیگیں زالبول ءُ چک لَٹ ءُ کُٹ کتگ اَنت ءُ اے مردم دزگیر کرتگ اَنت –

دمگی مردماں ٹی بی پی ءَ گوں گوشتگ کہ دو روچ ءَ پیسر تمپ ءِ دمگ کوھاڑ ءَ پاکستانی پوج ءَ دو کس بابا ء عباس ءُ اصغر ء عبدالرھمان دزگیر کنگ ءَ پد آوار جتگ اَنت کہ تنی وھدی آیانی ھچ ھال نیست اِنت –

زانگ بہ بیت بلوچستان ءَ بیگواھیانی جیڑہ روچ پہ روچ گیش ودان اَنت ءُ گوستگیں بیست ءُ چار ادارانی تہ ءَ یک درزنے ءَ گیش مردم بلوچستان ءِ جتا جتائیں جاھاں پاکستانی پوج ءَ دزگیر کرتگ ءُ گار کتگ اَنت –

دومی نیمگ ءَ شال ءَ گار ءُ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چاھزار ءُ سَے سد ءُ نوزدہ روچ سرجم بیتگ –

بنجل ءَ چہ مستونگ ءَ بی ایس او پجار ءِ گوستگیں دمگی سروک ناصر بلوچ، جمیعت طلبا اسلام ءِ گوستگیں جنرک سیکرٹری خالد مسعود ءَ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

ھمے وھد ءَ سال دوھزار ءُ سیزدہ ءَ شال کلی جیو ءَ زورانسری آوار جنگ بیتگیں ظفر اللہ ءِ مات بنجل ءَ اتکگ ءُ وتی زھرشانی نبشتگ کنائینتگ ئِے –

آئی ءَ گوشتگ کہ منی زھگ ءَ بازیں سالے بیت کہ گار کنگ بیتگ ءُ من نزاناں آ کجا اِنت ءُ چتور اِنت آئی ءِ بارہ ءَ مارا ھچ ھال دیگ بیگ ءَ نہ اِنت -ھاکمی زمہ واری بیت اِنت آ منی زھگ ءِ بارہ ءَ بہ گوش اَنت ءُ آ کجام جرم ءِ بنیاد ءَ گرگ بیتگ –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گوشت کہ ما یک رند ءِ پد ءَ وتی کوھنیں زمانگ ءَ گوں دُچار کپان اِنت ھمود ءَ ما بندات کرتگ یکے دومی ءَ نہ منّگ، کینگ ءِ رودینگ، زاتی پسند ءُ ناپسندی، زانتی زانش ءِ جاہ ءَ وتی گپانی درانگازگ –

آئی ءَ گوشت: بلوچ وتی گران بھائیں سراں دگانی سر، جنگل ءُ دمکاں سھر کنگ ءَ اَنت، مات وتی ورنائیں بچانی لاشانی سر ءَ موتک آرگ ءَ اَنت، پیر ءُ کماشیں پت وتی ورنائیں بچانی جسداں کوپگ دیگ ءَ اَنت –

ماما قدیر ءَ گوشتگ اَت کہ ما پرچا بے ھیال بیتگ اِنت کہ آیاں وتی بھر ءِ پرز پیلو کرتگ مارا نی چیزے کنگی اِنت، شھیداں وتی سھریں ھونانی گون ءَ ھما چراگ روک کتگ -بلے مئے نادانیں دوست وتی دوستانی پاد ءِ کشگ ءَ گر ءُ چِل اَنت –