ھزدار ءُ ھب ءَ ٹی ایل پی ءِ زھرشانی، بنجاھی شھدگاں مساپر جنجالانی دیمپان

بلوچستان ءِ دمگ ھزدار ءُ ھب ءَ تھریک لبیک پاکستان ءِ نیمگ ءَ چہ گوستگیں روچ ءَ زھرشانیانی درچ یکشل ءَ برجاہ اَنت زھرشانی کنوکاں بنجاھی شھدگ بند کتگ اَنت ءُ مساپراں جنجالانی دیمپانی اِنت –

گوستگیں روچ ءَ ھزدار ءَ ٹی ایل پی ءُ پورسز ءِ میان ءَ جنگ ءُ چوپ ءِ وھد ءَ پورسز ءِ تیرگواری ءَ یک باسکے جنگ بیتگ ءُ چریشی ءَ زھرشانی کنوک ترندی ءَ گندگ اتکگ اَنت –

زھرشانی کنوکاں جون ءِ ھمراھی ءَ گوستگیں شپ چمروک ءِ ھند ءَ گوازینتگ، ھمے وھد ءَ شال ءُ کراچی ءِ شھدگ بند کنگ بیتگ ءُ چریشی ءِ سوب ءَ مساپر بریں بس ءُ دگہ گاڑیانی دراج کتّار لگ اِتگ اَنت ھمے رنگ ءَ مروچی ھزدار ءِ شھر ءَ دربندیں ھرتال کنگ بیتگ –

تھریک لبیک ھزدار ءِ رھشون عطاء مھمد رضوی ءَ ھمے وھد ءَ ترندی ءَ گوشتگ کہ مئے باسک پُر ایمنیں رنگے ءَ زھرشانی کنگ ءَ بیتگ اَنت وتسرا پولیس ءُ دگہ سیکورٹی پورسز ءَ بیڑ برتگ ءُ پیسر ءَ آنسو گیس شیل جتگ ءُ پد ءَ لَٹ ءُ کُٹ ءُ پد ءَ تیرگواری بندات بیتگ -چریشی ءَ یک باسک مھمد سلیم تیرگواری ءَ جنگ بیتگ ءُ بازیں باسکے زدگ بیتگ اَنت –

آئی ءَ گوشت کہ اے وڑ ءَ سیکورٹی پولیس ءِ ناشری مئے پُرایمنیں زھرشانی ءِ سر ءَ اُرش کنگ زُلم ءُ زوراکیاں ھمینکس ایر بہ جن ایں کم اِنت –

دومی نیمگ ءَ شھدگانی بند بیگ ءِ سوب ءَ سدانی کچ ءَ مساپر ھزدار ءَ مھتل بیتگ اَنت، مساپراں ترندیں گرم ءِ دیمپانی کنگ کپگ اِنت – بلے دمگدار ھزدار ءِ نیمگ ءَ تنی وھدی اے درگت ءَ دگہ گپ دیم ءَ نیتکگ اَنت ءُ چریشی ءَ آیانی سر ءَ ایراد گرگ بیگ ءَ اِنت –

دومی نیمگ ءَ ھب شھر ءَ مروچی دومی روچ ءَ دوبر شھدگ ءِ روگ ءُ آیگی کشک بند کنگ بیتگ اَنت –

زانگ بہ بیت تھریک لبیک ءَ بیست اپریل ءَ سرکار ءِ ھلاپ ءَ زھرشانی زرمبشت ءِ بندات کنگ ءِ جار جتگ اَت – تھریک لبیک ءِ امیر حافظ سعد رضوی ءِ گوشگ بیتگ کہ سرکار بیست اپریل ءَ پیسر فرانس ءِ سفیر ءَ ڈیھ ءَ بہ کش اِیت –