روکپتی بلوچستان ءَ ایرانی مرساد ءِ تیرگواری ءَ یک مردمے بیران

روکپتی بلوچستان ءَ ھمک روچ تیرگواری ءُ دگہ وئیلاں لس مردمانی بیرانی ءُ زدگ بیگانی ھال یکشل ءُ رسانکجاھاں پیداک اَنت –

سر بیتگیں ھالانی رد ءَ رد ءَ گوستگیں روچ ءَ ایرانی مرساد ءَ روکپتی بلوچستان ءِ دمگ ھاش ءَ یک گاڑی ءِ سر ءَ تیرگواری کرتگ ءُ چریشی ءَ یک مردمے بیران بیتگ –

اھوالکار ءِ رد ءَ مرساد ءَ تیل باپاری کنوکیں گاڑی ءِ سر ءَ تیرگواری کرتگ ءُ چریشی ءَ گاڑی چپ بیتگ ءُ گاڑی ءِ ڈرائیور بیران بیتگ –

بیران بیتگیں مردم ءِ پجار مھسن مرادزئی ء غنی ءِ نام ءَ زانگ بیتگ –

ھمے رنگ ءَ نیکشھر ءَ ناشناسیں مردماں تیرگواری کرتگ ءُ یک مردمے کُشتگ، کُشتگیں مردمانی نام فرزاد باشندی ءِ نام ءَ زانگ بیتگ –

زانگ بہ بیت روکپت ءُ رودراتکی بلوچستان ءِ سیمسری ھندانی مھلوک ءِ در یکیں سیمسری اِنت کہ اشی ءَ میان ءِ کش اِتگیں لکیر ءِ بند بیگ ءِ سوب ءَ ھزارانی مردم بے روزگاری ءِ آماچ اَنت –

رودراتکی بلوچستان ءَ سیمسر ءِ بند بیگ ءِ سوب ءَ ھم مردمانی زھرشانی یکشل ءَ برجاہ اَنت ءُ مھلوک ءِ گوشگ اِنت کہ سیمسراں داشتگیں مردم تن ءُ شد ءَ بیران بیگ ءَ اَنت کہ تنی وھدی سَے کسانی بیرانی ھال بیتگ کہ تن ءَ جتگ ءُ بیران بیتگ –