بلوچستان ءَ کرونا وائرس ءَ دگہ پنجاہ ءُ پنچ کیس رپورٹ

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں پنجاہ ءُ پنچ دگہ نوکیں کیس دیم ءَ اتکگ وھدیکہ شاھدربر جاھاں دوازدہ مردم ءَ کرونا وائرس نادراھی ءِ گرگ پدر بیتگ –

جاندراھی ءِ بنشون ءِ رِد ءَ گوستگیں بیست ءُ چار ادارانی میان ءَ بلوچستان ءِ تہ ءَ نُھ سد ءُ سی ءُ ھشت مردم کرونا ٹیسٹ کنگ بوتگ ، کہ آھانی تہ ءَ پنجاہ ءُ پنج مردم ءَ کرونا نادراھی بوتگ- کرونا وائرس نادراھانی تہ ءَ چل ءُ پنچ شال ءَ، چار تربت ءَ سَے لسبیلہ یکے چاگی، یکے کچھی ءُ یکے بولان ءِ نندوک انت – اشاں پد بلوچستان ءِ تہ ءَ کرونا وائرس نادراھانی درستی کچ نوزدہ ھزار ءُ ھپت سد ءُ سِی ءُ چار ءَ سر بوتگ –

رپورٹ ءِ رِد ءَ شمبے ءَ بلوچستان ءِ تہ ءَ کرونا وائرس ءَ آماچ بوتگیں ھپت مردم جاندراہ بوتگ اَنت درستیں جاندراہ بوتگیں مردمانی کچ نوزدہ ھزار ءُ یکسد ءُ چل ءُ سَے انت – وھدیکہ بلوچستان ءِ تہ ءَ اے وھدی سَے سد ءُ ھشتاد نادراہ ھست انت ءُ کرونا وائرس آماچ بوتگیں ھشت مردم ھائی آکسیجن فلور انت –

رپورٹ ءِ رِد ءَ بلوچستان ءِ شاھدربر جاھاں یکسد ءُ چل ءُ پنچ مردمے ٹیسٹ کنگ بوتگ کہ آھانی تہ ءَ دوازدہ مردم کرونا آماچ انت –

رپورٹ ءِ رد ءَ بلوچستان ءِ تہ ءَ جھانی وباء کرونا وائرس ءِ نادراھی ءَ بیران بوتگیں مردمانی کچ دوسد ءُ یازدہ سر بوتگ اَنت – بلوچستان ءِ تہ ءَ کرونا نادراھی ءِ گیشتر تالان بوگ ءِ برزی پنچ بما ھشتاد ءُ شش در سد انت-