پنجگور: باڈر ءِ بندش ءِ ھلاپ ءَ مھلوک ءِ زھرشانی، دگ بند

بلوچستان گولڈ سمڈ لائن (روکپت ءُ رودراتکی بلوچستان ءِ سیمسر) ءِ بندش ءِ ھلاپ ءَ بلوچستان ءِ دمگ پنجگور ءَ باپاری مردمانی سیمی روچ ءَ زھرشانی برجاہ –

شھر سرجم ءَ بند ءُ ٹائر اش بند داتگ ءُ روگ ءُ آیگی مھتل –

گیشیں ھالانی رد ءَ شمبے ءِ روچ ءَ مھلوک ءَ بازیں کچے ءَ شھر ءِ دراھیں باپاری بنجل بند کرتگ ءُ دگ بندیں ھرتال ءُ زھرشانی کرتگ –

زھرشانی کنوکاں پنجگور ءَ ھواریں ایران ءِ سیمسر ءِ بندش ءِ سر ءَ زھر ءِ درشان کنان ءَ گوشتگ کہ مئے گسانی آس روکی بند بیتگ اَنت ھاکماں ھچ پرواہ نیست –

آیاں گوشت کہ سیمسر ءِ دوئیں نیمگاں بلوچ آباد اَنت ءُ یکے دومی ءِ سیاد ءُ وارس اَنت ءُ مردم اد ءُ اوداں یکے دومی ءِ درد ءُ وشیاں ھوار بنت، بلے نِی پاکستانی پوج ءَ مردمانی زندمان ھم پچ گپتگ –

آیاں گوشت کہ باپاری ءِ سرجم ءَ بند بیگ ءِ ھواری ءَ نِی مئے زالبولانی گون ءَ بے ھودی کنگ ءَ اَنت آیاں کلاں داں لین کن اَنت ءُ اوشتارین اَنت –

آیاں گوشت کہ بلوچ چاگرد ءَ اے وڑیں رویش اوپاری نہ اَنت ما مزنیں واکداراں گوں دزبندی کن ایں کہ سیمسر ءَ پچ بہ کنت ءُ مھلوک ءَ شرپ ءِ گون ءَ والینگی ءِ اجازت ءَ بہ دنت –

زانگ بہ بیت بلوچستان ءِ گولڈ سمڈ لائن (روکپت ءُ رودراتکی بلوچستان ءِ سیمسر) ءِ بندش ءِ ھلاپ ءَ گوادر ءَ گوستگیں روچ ءَ ڈپٹی کمشنر ءِ کارگس ءِ دیم ءَ مھلوک ءَ بازیں کَچے ءَ نندانک جتگ ءُ نشتگ اَنت پاکستان ءِ کوسٹ گارڈ ءِ رویش ءِ ھلاپ ءَ زھرشانی کرتگ –

رودراتکی بلوچستان ءِ بازیں جاہ سیمسرانی بند بیگ ءَ مردمانی نیمگ ءَ زھر ءِ درشان بیگ ءَ اَنت ءُ بازیں روچاں گوادر ءُ پنجگور ءَ زھرشانی برجاہ اَنت –