بلوچستان ءَ جتا جتائیں وئیلاں سَے مردم بیران، بیست ءُ یک ٹپی

سربوتگیں ھالانی رِد ءَ بلوچستان ءِ دمگ تفتان، ھزدار ءُ خاران ءَ دگ ءِ وئیلاں ھبدہ مردم ٹپی ءُ دو مردم بیران، شال ءَ تیرگواری وئیلے ءَ سَے مردم ٹپی وھدیکہ نصیرآباد ءَ گیرت ءِ نام ءَ پت ءَ جنکیں چُک کُشتگ ءُ یکے زدگ کُتگ –

گیشیں ھالانی رِد ءَ بلوچستان ءِ دمگ تفتان ءَ دو گاڑیانی ڈیک ورگ ءِ سوب ءَ یک مردمے بیران ءُ پانزدہ ٹپی بوتگ اَنت –

وئیل تفتان ءِ نزیک ءَ کوہ ءِ دلیل ءَ دیم ءَ اتکگ کہ دو ویگو گاڑیانی ڈیک ورگے سوب ءَ پانزدہ مردم سک باز ٹپی بوتگ اَنت وھدیکہ امین اللہ ء حاجی شمس الدین ھما جاہ بیران بوتگ –

ٹپی بوتگیں مردم ھما دمان ءَ ایف سی نادراھجاہ نوکنڈی ءَ برگ بوتگ انت، ٹپی بوتگیں مردمانی تہ ءَ شش چُک دو زالبول ءُ ھپت مردین ھوار اَنت-

دگہ وئیلے بلوچستان ءِ دمگ ھزدار ءَ پیش اتکگ کہ اود ءَ یک مردمے بیران بیتگ –

ھزدار ءِ دمگ وھیر ءَ دگ ءِ وئیل ءَ یک مردمے بیران بوتگ، بیران بوتگیں مردم ءِ پجار یوسف ء حاجی نبی وارس جھمنند وھیر وڈھ ءِ نام ءَ چہ بوتگ –

ھمے وڑ بلوچستان ءِ دمگ ھاران بسیمہ ءَ گاڑی ءَ گوں موٹر سیکلے ءَ ڈیک وارتگ، ڈیک ورگ ءِ سوب ءَ موٹر سیکل ءَ سواریں دو مردم ٹپی بوتگ اَنت –

وئیل کلی غلام رسول کنڈگ ءَ دیم ءَ اتکگ کہ گاڑی ءِ دام کنگ ءَ پت گوں چُک ءَ ٹپی بوتگ-

ٹپی بوتگیں مردمانی پجار عبدالجلیل ءُ کریم بخش ءِ نام ءَ چہ بوتگ انت دوئیں مردم بسیمہ نادراھجاہ ءَ سرکنگ بوتگ انت ، پہ گیشیں الاج ءِ ھاتر ءَ کریم بخش ھزدار ءَ دیم دیگ بوتگ –

شال ءَ تیر گواری ءِ وئیلے ءَ سَے مردم ٹپی بوتگ اَنت –

ھالکارانی رِد ءَ شال ءَ زرغون مارکیٹ ءِ نزیک ءَ ناشناسین مردمانی تیر گواری ءَ سَے مردم ٹپی بوتگ اَنت-

ٹپی بوتگین مردم نادراھجاہ ءَ سرکنگ بوتگ انت – اے درگت ءَ گیشیں پٹ ءُ پول دمگی پولیس کنگ ءَ اَنت –

دومی نیمگ ءَ بلوچستان ءِ دمگ نصیر آباد تمبو ءَ گیرت ءِ نام ءَ پت ءَ وتی جنکیں چُک تپر ءِ سر ءَ کُشتگ ءُ یکے مردمے زدگ کُتگ –

پولیس ءِ رِد ءَ کتکار صابر ءَ گیرت ءِ نام ءَ وتی جنکیں چُک افروز بی بی تپر جتگ کُشتگ ءُ محمد اکبر نامیں مردمے ٹپی کُتگ ءُ تتکگ –

ھال سر بوگ ءَ دمگی پولیس ءَ وت ءَ وئیل جاہ ءَ سر کتگ ءُ لاش ءُ ٹپی بوتگیں مردم دست گپتگ ءُ نادراھجاہ ءَ سر کتگ انت اژدری چار ءُ ٹپاس ءَ پد لاش کھول ءِ ھوالہ ءَ کنگ بوتگ اے درگت ءَ خان کوٹ ءِ پولیس گیشیں پٹ ءُ پول کنگ ءَ انت –

زانگ بہ بیت نصیر آباد ءَ ھوار بازیں جاھاں گیرت ءِ نام ءَ زالبول کُشگ بیگ ءَ اَنت بلے واکدار ءُ دمگ ءَ ھواریں مردمانی نیمگ ءَ بیوکیں وئیلانی بارہ ءَ دگہ گیشیں سرپدی دیم ءَ نیایگ ءَ اَنت –