شال ءَ بیگواھیں مردمانی ھاتر ءَ زھرشانی برجاہ

بلوچ زالبولانی کرد روچ پہ روچ مھکم تر بوان انت – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ پنجاہ ءُ شش روچ سرجم بوتگ – نیشنل پاٹی ءِ میر عبدالغفار قمبرانی، بی ایس او ءِ شکور بلوچ، کارمریڈ اسرار بلوچ ءُ زالبولاں مزنیں کچے ءَ زھرشانی بنجل ءَ اتکگ ءُ بیگواھیں مردمانی کھولانی گون ءَ پدردی درشان اِتگ –

ھمے وھد ءَ ماما قدیر بلوچ ءَ اتکگیں مردمانی گون ءَ تران کنان ءَ گوشتگ کہ بلوچستان ءِ تہ ءَ ھاسکر بلوچانی گون ءَ بؤکیں زوراکیانی داستان باز دراج کش اَنت – بلوچستان ءِ ایردستی ءَ بگر تاں روچ ء مروچی زلم ءُ زوراکیاں ھزارانی کچ ءَ بلوچ شھید کنگ بوتگ اَنت ءُ ھزارانی کچ ءَ پرزند آوار جنگ ءُ بیگواہ کنگ بوتگ انت –

آئی ءَ گوشتگ کہ دو ھزار یک ءَ بگر تاں روچ ء مروچی بلوچانی بگیری ءَ پوجی لشکر کشی کنگ بوگ ءَ اَنت بلے اے اولی رند انت کہ بلوچ زالبول مردیناں گوں ھمکوپگ ءُ ریاستی ادارھانی بگیری ءَ پُرایمنیں جُھد ءَ ھوار بوتگ انت –

آئی ءَ دیمتر ءَ گوشتگ ریاستی ادارھانی دست ءَ آوار جنگ ءُ بیگواہ بوتگیں بلوچانی یل کنائینگے ھاتر ءَبلوچ زالبولانی کِرد روچ پہ روچ مھکم تر بوان انت ، بلوچانی ھکانی ھاتر ءَ پُرایمنیں جھد ءَ زھرشانی بنت، روانک ءُ دراجیں پند یا شدکشیں زھرشانی بنجل بلوچ زالبول ھر کجا ساڑی انت –

ماما قدیر بلوچ ءَ گوشتگ کہ بلوچستان ءِ تہ ءَ ریاستی ادارھانی دست ءَ زورانسری آوار جنی، آھانی کوش ءُ انسانی ھکانی لگتمالیانی بگیری ءَ بلوچ راجی توار جوڑ بوتگ اَنت بلے یک نیمگے بلوچ زالبولانی ھوار بوگ ءَ بلوچستان ءَ پُرایمنیں جھد ءَ یک نوکیں تاب ءِ داتگ ءُ ھما ریاستی ادارہ ءُ اسٹیبلشمنٹ ءِ بلوچانی بگیری ءَ رویہ ءُ پندلانی تہ ءَ ھم بدلی اتکگ –

آئی ءَ گوشتگ کہ اگاں پاکستان یک جمھوری ملکے ءُ اے ملک ءِ تہ ءَ بلوچ زالبول وتی دوستیگیں مردمانی گون ءَ بوتگیں زلم ءُ زوراکیانی زھرشانی ءَ انت گڑا ریاست ءِ پرز انت کہ آ ناکہ تھنا بس آھانی جیڑھاں گوش بداریت بلکیں گیشگیواری ءِ ھاتر ءَ سنچ مندین ءُ ترندیں گامگیج بہ زوریت –