نبشتانک: بلوچ راج ءَ تِپاک بیگ لوٹ اِیت
نبشتہ کار: عبیداللہ کلمتی
دی بلوچستان پوسٹ
ناتِپاکی یک سکّیں سِلّیں چیزے، اگاں اے چیز یک راجے ءِ، یک ٹکّے ءِ، یک کھولے ءِ ءُ یک مُلکے ءِ سر ءَ کپت گڑا آ سک پدمنتگ ءُ ویران بیت، ایشی ءِ درور مئے ءُ شمئے دیم ءَ اِنت، ما ءُ شما ایشی ءَ چم ء وت گندگ ءَ اِیں کہ مئے راج بزاں بلوچ ءِ سر ءَ کپتگ، اگاں ما اے گپ ءَ بہ گُش اِیں کہ بلوچ ءِ پدمنتگی ءِ یک مزنیں سَوَبے ناتِپاکی اِنت گڑا رد نہ بہ اِیں، مئے راج سک ناتِپاک اِنت چہ ھمے سَوَب ءَ پہ بلوچ ءَ وشّیں روچ نیست، ھر وھد ءَ بلوچ بزّگ اِنت، پہ پِٹّے آپ ءَ ھم بلوچ تلوس اِیت، پہ بلوچ ءَ ناں شرّیں وانگجاہ ءُ شھدربرجاھے ھست ءُ ناں یک جْوانیں تْرھجاہ ءُ نادْرھجاھے ھست، ناں شرّیں دگ ھست، لھتیں ھونی ئیں دَگ اَنت کہ یک سالے ءَ ھزارانی کساس ءَ ھمے دگانی سَوَب ءَ بلوچ شھید بنت، دامچراگ(بجلی) ءَ وَ یلہ کن ھمے گیس کہ بلوچ ءِ گُلزمین ءَ در آیگ ءَ اِنت ھمے ھم نہ رس اِیت ئِے، ناں کہ امن ءُ ایمنی یے ھست، چشیں روچے نیست کہ بلوچستان ءَ ماں جاگھے ءَ بمبے نہ تْرکّ اِتگ، زوراکاں مردمے گار نہ کتگ ءُ نہ کُشتگ، ناں کار ءُ روزگارے ھست، بلوچستان ءِ ھر کنڈ ءَ آس روک اِنت، لھتیں جاھاں مردم گار اَنت، لھتیں جاھاں گریبی ءُ بزّگی اِنت، لھتیں جاھاں پاکستان ءِ لشکر بزّگیں بلوچاں جنَگ ءُ چوپگ ءَ اِنت، مئے مات، گھار، برات ءُ کماش ھرّوچ دَگانی سر ءَ جتاھیں جیڑوانی سَوب ءَ زھرشانی کنگ ءَ اَنت، ھر دمگ زُلمانی آماچ اَنت، بلوچستان ءِ سروزیر، پرگِنگی وزیر ءُ اسمبلی ءِ باسک ھم پَوج ءِ گچین کتگین اَنت، بلوچ ءِ کجام جیڑو ءَ دیم ءَ بْیار اِیں؟ ھمینچو باز اَنت کہ ما وتی جاگہ ءَ، یک ھِساب زانتے ھم منی ھیال ءَ ھساب کُت نہ کنت اِش، اے دْراھیں جیڑواں یلہ دے اِیں ءُ کا اِیں ھمے ناتِپاکی ءِ گپ ءَ کن اِیں کہ ھمیشی ءَ مرچی بلوچ ءُ بلوچستان پرے ھال ءَ کتگ، بلوچ ءِ راجکاری(سیاست) ءِ تہ ءَ ناتِپاکی ھست، لبزانک ءِ تہ ءَ ھست، جنگ ءِ تہ ءَ ھست، چاگِرد ءِ تہ ءَ ھست ءُ چہ ایشاں اَبید ھم دگہ بازیں چیزانی تہ ءَ ھست، راجکاری ءِ تہ ءَ چون ھست؟ انّی ما بہ چار اِیں کہ بلوچ جمھوری راجکاری گَل ھست اَنت یا کہ راجکارانی جند، اے دْرست ناتِپاک اَنت، یکّے دومی ءَ ھراب گُش اَنت، اگاں ما بلوچ اسٹوڈنس آرگنائزیش(bso) ءَ بہ چار اِیں کہ بلوچ ءِ مستریں راجکاری گَل اِنت اے ھم تِپاک نہ اِنت بلکیں جتا جتا اِنت، یکّے بی ایس او پجّار اِنت، یکّے بی ایس او آزاد اِنت ءُ دگہ نہ زان آں گوں کجام نام ءَ زانگ بیت، بلوچ ءِ لبزانک ءِ توک ءَ ھم ناتپاکی ھست انچوش کہ دنیگا مئے بلوچ لبزانکار یکّیں سْیاھگ ءِ رھبند ءِ سر ءَ ھم تِپاک ءُ ھم لیکہ نہ اَنت، یک لبزانکارے سید ھاشمی ءِ سْیاھگ ءَ نبیسّ اِیت ءُ دگہ یکّے اِنّا۔
بازیں لبزانکارے بلوچی ءَ تازی ءِ زگریں آباں زیر اِیت ءُ لھتے انّا، اے سک بژنی گپّے کہ یک زبانے ءَ یک انچیں سْیاھگے نیست کہ سرجمیں لبزانکار ھمے یکّیں سْیاھگ ءِ سر ءَ تِپاک ءُ دلجم بہ بنت، مردم ءَ سک بژن بیت، جنگ ءِ تہ ءَ چون ناتِپاکی ھست؟ بازیں وھد اِنت کہ بلوچ ءِ آجوئی ءِ جنگ بیگ ءَ اِنت، ایشی ءِ تہ ءَ ھم منی نزّ ءَ تِپاکی نیست، یک جنگی گَلے بلوچ لبریشن آرمی(bla) ءِ نام ءَ زانگ بیت ءُ دگہ یکّے بلوچستان لبریشن پرنٹ(blf) ءِ نام ءَ زانگ بیت ءُ دگہ ھم گَل ھست کہ جتائیں ناماں گوں زانگ بنت بلے ایشانی بایَد ھمیش اَت کہ اے دْراہ ھوار بیتین اَنت، یکجاہ بیتین اَنت، بلے چوش نہ اِنت، (البت من اے گپ ءَ رد ھم بیت کناں) مئے تہ ءَ چاگردی ناتِپاکی ھم ھست کہ ما وتی چاگرد ءِ تہ ءَ ناتِپاک اِیں، ھمسائگ گوں ھمسائگ ءَ جنگ کنت، برات گوں برات ءَ، اے شر نہ اَنت بلکیں پہ مارا تاوان اَنت، چاگِردی ناتپاکی سکّیں ھرابیں چیزے۔ ءُ دگہ یک ھم مزنیں ناتِپاکی یے مئے تہ ءَ ھست، آ ایش اِنت کہ ما اے گپ ءِ سر ءَ پھر نہ بند اِیں کہ ما بلوچ اِیں بلکیں ما اے گپ ءِ سر ءَ پھر بند اِیں، درور من گشاں کہ من کلمتی یے آں، دگہ یکّے گُش اِیت من رِندے آں، یکّے گُش اِیت من چہ پِلاں ٹَکّ ءَ سْیادی دار آں، اے ناتِپاکی ءَ بلوچ بے کساس تاوان داتگ، انّا! مارا وتی ٹکّانی سر ءَ پھر بندگ نہ لوٹ اِیت، وتی پیرُکانی سر ءَ پھر بندگ نہ لوٹ اِیت، بلکیں مارا اے گپ ءِ سر ءَ پھر بندگی اِنت کہ ما بلوچ اِیں، ما چہ ھما راج ءَ اِیں کہ آئی ءِ تہ ءَ مھمانداری، ایمانداری، میارداری، دلیری ءُ دگہ شرّی مان اِنت، مارا بلوچ بیگ لوٹ اِیت، تپاک بیگ لوٹ اِیت، یکمُشت ءُ ھم ھیال بیگی اِنت۔
اگاں ما تِپاکی ءُ ھم دستی ءَ پہ وت گچین بہ کن اِیں گڑا الّم پہ بلوچ ءَ مادنیں راھے در کیت، بلوچ ءِ جیڑو توجیلّ بیت کن اَنت، وتی ھکّ ءَ چہ ریاست ءَ پچ گِپت کت کنت، وت ءَ چہ زوراکانی دست ءَ آجو کت کنت، پہ وت ءَ یک شرّیں ءُ بْراھداریں چاگِردے جوڑ کنت بلے بس ما تِپاک بہ بہ اِیں انشاءَاللہ زوت دیمروی کن اِیں ءُ چو انگریزانی وڑ ءَ ماہ ءِ سر ءَ سرکپ اِیں ءُ پد ءَ دیم پہ مریخ ءَ سرگِر اِیں۔
بلوچ ءُ بلوچی ءُ بلوچستان زندگ بات اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت