روکپتی بلوچستان ءَ کُشتگیں پوریاگر: زھرشانیانی میانی ءَ پولیس ءِ تیرگواری، دو کس بیران

روکپتی بلوچستان ءِ سیمسراں “کُشگ ” بیتگیں پوریاگرانی وئیل ءِ پژدر ءَ روکپتی بلوچستان ءَ زھرشانیانی میان ءَ پولیس ءَ تیرگواری کرتگ ءُ دو مردم بیران بیتگ اَنت، روکپتی بلوچستان ءِ بنجاھی شھر زاھدان ءِ دارالعلوم امام جمعہ اھل سنت سیستان و بلوچستان ءِ سروک مولانا عبدالحمید ھم سراوان ءَ سر بیتگ ءُ اود ءَ مردمانی میان ءَ آئی ءَ تران کرتگ –

روکپتی بلوچستان ءِ سیمسراں پیش اتکگیں وئیل ءِ پژدر ءَ روکپتی بلوچستان ءِ جاور نگیگ بیتگ اَنت اود ءَ گوستگیں روچ ءَ ھرتال ءُ زھرشانی بیتگ اَنت –

زھرشانیاں مھلوک ءَ سرکاری کارگس ءُ دگہ چیز تاوان داتگ اَنت ءُ مھلوک ءِ گوشگ اِنت ایران ءِ سرکار بلوچانی لاپ ءِ شوھاز ءَ بند کنگ ءُ لاپ شوھاز کنوکیں مردماں کُشگ اِنت – چاگردی رسانکجاھاں ایران ءِ سرکار ءِ سر ءَ ایراد گرگ بیگ ءَ اِنت ءُ بلوچ تکاں اے وئیل پہ بلوچانی ھمک وھدی کوش گوشگ بیگ ءَ اِنت –

رودراتکی بلوچستان ءَ سیاسی گلانی نیمگ ءَ ھم اے وئیل ایرجتگ ءُ وئیل ءِ پَٹ ءُ پول ءِ لوٹ کنگ ءِ دزبندی کنگ بیتگ اَنت –

ٹی بی پی اھوالکار ءِ رد ءَ گوستگیں روچ ءَ زھرشانیانی میان ءَ پولیس ءِ تیرگواری ءَ دو کس بیران بیتگ اَنت –

زھدان ءَ بیست میل دور سرجنگل ءَ مھلوک ءَ زھرشانی کرتگ ءُ اود ءَ مھلوک ءَ پولیس ءِ کارگس ءِ سر ءَ اُرش کرتگ ءُ اود ءَ پولیس ءِ تیرگواری ءَ دو کس بیران بیتگ اَنت –

ھمے وڑ ءَ گوستگیں روچ ءَ روکپتی بلوچستان ءِ دمگ سراوان ءَ دالعلوم امام جمعہ اھل سنت ءِ سروک مولانا عبدالحمید ھم سر بیتگ –

اود ءَ مولانا عبدالحمید ءَ سراوان ءِ مردماں گوں دزبندی کرتگ ءُ گوشتگ کہ مھلوک وتی ایمنی ءِ زھرشانیاں بہ کنت ءُ سرکار ءَ ھمے سماہ ءَ بہ پِرین اِیت کہ ما چنڈے نان ءِ واستا در پہ دری ءَ تچگ ءَ اِنت –

آئی ءَ گوشتگ کہ مھلوک سرکاری کارگس ءُ پولیس ءُ دگہ ادارھاں تاوان مہ دنت آ وتی ھک ءِ واستا زھرشانی بہ کن اَنت ءُ سرکار ءَ ھمے لوٹ ءَ بہ کن اَنت مئے واستا شریں کار ءُ روزگار مارا بہ دنت –

آئی ءَ گوشتگ کہ سیمسر پہ لاپ شوھاز کنوکانی واستا پچ کنگ بہ بیت ءُ چوش مردمانی سر ءَ زوراکی کنگ مہ بیت –

اے گپ آئی ءَ سراوان ءِ عیدگاہ ءَ بازیں مھلوک ءِ مُچی ءِ میان ءَ کرتگ اَنت –

زانگ بہ بیت گوستگیں سَے روچ ءَ پیسر روکپتی بلوچستان ءِ سیمسر حق آباد ءَ ایرانی پاسداران انکلاب ءِ لشکر ءِ تیرگواری ءَ لس مردمانی رد ءَ کم چہ کم ءَ سِی ءُ ھپت کس بیران بیتگ اَنت کہ اشانی تہ ءَ دَہ کسانی نام دیم ءَ اتکگ اَنت آ دگہ مردمانی نام تنی وھدی زانگ نہ بیتگ اَنت ءُ روکپتی بلوچستان ءِ بازیں جاھاں انٹرنیٹ سروس بند کنگ بیتگ اَنت –