بلوچستان: زورانسری آوار جنگ بوتگیں پنچ مردم یلا بوتگ اَنت

دی بلوچستان پتر ءَ سربوتگیں ھالانی رِد ءَ بلوچستان ءُ کراچی ءَ چہ زورانسری آوار جنگ ءُ بیگواہ بوتگیں پنچ مردم یل بوتگ انت –

یل بوتگیں مردمانی پجار شاکر ء ولی محمد جھمنند نظر آباد ، اسد ء عبداللہ جھمنند ملک آباد ءُ جمیل ء حبیب اللہ جھمنند نظرآباد مروچی تربت ءِ پوجی بنجل ءَ چہ یل بوتگ ءُ وتی گِس ءَ سربوتگ انت –

اھوالکار ءِ رِد ءَ ھر سئیں مردم گوستگیں سال ءَ مئی ءِ ماہ ءَ پاکستانی پوج ءِ دست ءَ آوار جنگ ءُ بیگواہ کنگ بوتگ انت –

فھد ء ابراھیم جھمنند تمپ ملانٹ ھم یل بوگے ھال آیگ انت کہ آ ھم چہ تربت ءَ پوجی بنجل ءَ یل بوتگ ءُ گِس ءَ سربوتگ –

دومی نیمگ ءَ یکشمبے ءِ روچ ءَ چہ کراچی ءَ ناشناسیں مردمانی دست ءَ آوار جنگ ءُ بیگواہ بوتگین سراج بلوچ جھمنند پنجگور گچک گوستگیں روچ ءَ یل بوتگ –

زانگ بہ بیت گوستگیں یک دھکے ءَ چہ گیش انت کہ بلوچستان ءِ تہ ءَ زورانسری آوار جنی رِد یکشل ءَ برجاہ انت – بیگواھیں مردمانی کھول گوستگیں بازیں سالاں چہ کراچی ءُ شال پریس کلب ءِ دیم ءَ چہ وائس فار بلوچ مسنگ پرسنز ءِ نیمگ ءَ برجاھیں بنجل ءَ وتی زھر شانی ءَ نبشتہ کنائینگ انت –

بلوچستان ءَ کار کنوکیں انسانی ھکانی گل بی ایچ آر سی ءِ رِد ءَ بلوچستان ءِ تہ ءَ انسانی ھکانی بگیری ءُ مردمانی آوار جنی ءِ جیڑہ روچ پہ روچ گیشتر بوان انت، مردمانی یل کنگ ءِ ھمراھی ءَ چد ءُ گیشتر مردم اوار جنگ ءُ بیگواہ کنگ بنت –

میان استمان ورکنگ گروپ بنام زورانسری یا گیر ارادی آوارجنی ءِ یکسد ءُ بیست سیمی چار ءُگزاری مراگش ءَ بلوچ ھیومن رائٹس کونسل بی ایچ آر سی ھوار بوتگ – مراگش ءَ بی آیچ آر سی ءِ انفارمیشن سیکرٹری کمبر مالک بلوچ ءَ بلوچستان ءِ جاورھال ءُ بلوچستان ءِ تہ ءَ چہ ریاست پاکستان ءِ نیمگ ءَ بلوچانی زورانسری اوارجنی ءِ درگت ءَ ورکنگ گروپ گیشیں سرپدی داتگ اَنت –

بی ایچ آر سی ءَ بلوچستان ءِ تہ ءَ زورانسری آوار جنی ءُ انسانی ھکانی لگتمالی ءِ دارگ ءُ بیگواھیں مردمانی یل کنائینگ ءِ ھاتر ءَ لوٹ کتگ کہ پاکستانی سرکار ءِ سر ءَ زور دیگ بہ بیت –