ماتی زبان ءِ میان اُستمانی روچ ءِ درگت ءَ پنجگور ءَ دیوان، شال ءَ سَے روچی کتابی فیسٹیول

ماتی زبان ءِ میان اُستمانی روچ ءِ درگت ءَ بونستان پبلک لائبریری ءِ سنڈے سرکل ءِ چل ءُ پنچمی نیاد برجم دارگ بیتگ –

بونستان پبلک لائبریری ءِ نیمگ ءَ بونستان ھیلکاری ءِ جاہ ءِ ازمکاراں بھر زرتگ ءُ دیوان ءَ ماتی زبانانی میان اُستمانی روچ ءِ درگت ءَ بلوچی زبان ءَ سوت گوشتگ –

بونستان ءِ ازمکاراں ابید دیوان ءَ بی پی ایل ءِ باسکاں ھم بھر زرتگ کہ آیانی تہ ءَ فتح جان، حاتم بلوچ، معراج بلوچ، سلا الدین ءُ بازیں گشندھاں سوت گشتگ ءُ اشانی ابید ھم بونستان ءِ نامی ئیں گشندہ نور حسین نور ءُ کریم جان کرم ءَ ھم دیوان ءِ دلگوش وتی نیمگ ءَ ترینتگ ءُ سوت جتگ –

ھمے وڑ ءَ شال سریاب ءَ ماتی زبانانی میان اُستمانی روچ ءِ درگت ءَ سَے روچی کتاب جاھی بنجل ءِ جوڑ کنگ بیتگ کہ اود ءَ جتا جتائیں وانگی ایر کنگ بیتگ اَنت –

کتاب جاہ ءِ سَے روچی بنجل ءَ شال ءَ ھواریں نودربراں بازیں کچے ءَ اتکگ ءُ کتاب زرتگ اَنت –

چریشاں ابید چاگردی رسانکجاں ھم ماتی زبان ءِ میان اُستمانی روچ ءِ درگت ءَ دنیا ءِ آدگہ راجانی وڑ ءَ بلوچی زبان ءَ بندوکیں مردماں ھم ھمے روچ ءَ وتی زبان ءِ ارزشت ءِ سر ءَ جتا جتائیں لیکہ درشان کرتگ اَنت –

ھمے درگت ءَ چاگردی رسانکجاھاں بلوچ کواس ءُ زبان زانت ڈاکٹر ناگمان بلوچ ءَ گوشتگ کہ زبان زانت ءِ راجانی تہ ءَ ھما وسیلہ اِنت کہ آ وتی زبان ءَ آؤکیں پدریچ ءَ سر کنت –

آئی ءَ گوشتگ کہ زبان ءِ وسیلہ ءَ راجانی دود ءُ ربیدگ زندگ مان اَنت ءُ زبان راجانی ھمک پڑ ءَ ھوار اِنت، آئی ءَ گوشتگ کہ کجام ھم راجے ءِ زبان گار ءُ بیگواہ اِنت گڑا آ راجانی دیمروی ھچ درد نہ وارت اِنت –

ھمے وڑ ءَ سید ریفرنس کتاب جاہ ءِ سروک ڈاکٹر رمزان بامری ءَ ھم زبان ءِ درگت ءَ وتی لیکہ درشان کرتگ ءُ گوشتگ کہ مارا وت ءَ زبان ھست، سرڈگار ھست، دود ءُ ربیدگ ھست ما کجا دگرانی زبانانی چیر ءَ میلانک بہ بہ ایں –

آئی ءَ گوشتگ کہ بلوچ راجدپتر ھمینکس مزن ءُ شاھیگان اِنت ءُ ھمے کساس ءَ بلوچی زبان ھم کرناں پیداک اِنت ءُ مارا وتی زبان ءَ گوں گپ کنگی جنگی اِنت،نبشتگ کنگی اِنت –

آئی ءَ گوشتگ کہ ما وتی زمین ءِ سر ءَ وت ءَ درامد سرپد بہ ایں ءُ دگہ زباناں گپ جن ایں گڑا بزاں ما وتی زبان ءِ بستار ءَ ھچ زانگ ءَ نہ اِنت – آئی ءَ گوشتگ کہ ما وتی زبان ءَ کارمرز کن ایں گڑا آ روچ دور نہ بیت مئے زبان دیمروی کنت، آئی ءَ گوشتگ زبان تھنا لوگ ءِ تہ ءَ دیمروی کرت نہ کنت بلکیں ھمک پڑ ءَ زبان ءِ سر ءَ گپ کنگ بہ بیت –

زانگ بہ بیت بیست ءُ یک فروری دنیا ءَ ماتی زبانانی میان اُستمانی روچ دارگ بیت اِنت ھمک راج اے روچ ءَ وتی زبان ءِ سر ءَ پھر کنت ءُ آئی ءِ دیمروی ءِ واستا جھد کنت –

ماتی زبانانی میان اُستمانی روچ ھبدہ نومبر نوزدہ سد ءُ نود ءُ نُھ ءَ یونیسکو ءَ اے گپ دیم ءَ اتکگ کہ بست ءُ یک فروری ماتی زبانانی میان اُستمانی روچ دارگ بہ بیت –

ماتی زبانانی میان اُستمانی روچ سال دوھزار ءُ ھشت ءَ اولی بر ءَ دارگ بیتگ، ھمے وڑ بیست ءُ یک فروری ءِ روچ ءِ دارگ ءِ یک سوبے ماں بنگلہ دیش ءَ نوزدہ ءُ پنجاہ ءُ دو ءَ بنگالیانی زبان ءِ درگت ءَ ھم گوشگ بیت اِنت –