کراچی ءَ بیگواھیں مردمانی ھاتر ءَ زھرشانی برجاہ

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی برجاہ – زھرشانی مروچی چار ھزار ءُ دوسد ءُ نُھ روچ سرجم بوتگ – ٹنڈو الہ یار سندھ ءَ بلوچ برات دوست محمد، دانش میر، طارق بلوچ، قادر بخش بلوچ، میر عبدالجبار ءُ دگہ مردماں بنجل ءِ تر ءُ تاب کُتگ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ پُرایمنیں جد ءُ جھد ءِ تہ ءَ دیمونی ءُ بلوچ پرزندانی شھیدی ءَ چہ مروچی بلوچانی تھ ئِے جزبگ ءُ مھر ءُ گلانی گوما سیادی بدولت ءَ مئے پُرایمنیں جھد پرزندانی آجوئی ءِ ھاتر ءَ گام جنان اَنت –

آئی ءِ گوشگ ات کہ بلوچ پرزندانی آوارجنی ءُ بیگواھی ءَ دژمن ھچبر وتی آسریءَ گپت نہ کنت – دژمن ردی کنگ انت آئی ءَ بلوچ آوار نہ جتگ انت بلکیں دنیا ءِ دیم ءَ بلوچ زاھر کرتگ انت –

آئی ءَ گوشتگ کہ دنیا ءِ تہ ءَ اگاں زوراکیں تاکتوراں بہ چاریں گڑا زورگپت ءِ راجدپتر ھمے گوش ایت کہ زورگپتیں تاکت مدامی ءَ ایردست ءُ مزلومیں راجانی سربراہ نشانگ کتگ اَنت- تانکہ آھانی تہ ءَ توار چست کنوکیں سیاسی رھشون ءُ رھبر مہ بیت تانکہ آ رھشون ءَ چہ زبھر بہ بنت جھد کرت مہ کن انت –

ماما قدیر بلوچ ءَ گوشتگ کہ مروچی پرایمنیں جد ءُ جھد ھما جاہ ءَ سر انت راجی زانت ءِ پدراھی بس زھرشانی ءُ روانکانی تہ ءَ نہ بستگ اَنت بلکین ھر ھما پندل بے سوب کنگ انت کہ راجی پرایمنیں جھد ءِ بگیری ءَ بوگ ءَ انت –

دومی نیمگ ءَ بیگواھیں انسانی ھکانی باسک راشد حسین بلوچ ءِ زورانسری اوار جنی ءُ بیگواھی ءِ درگت ءَ چاگردی ترامجاہ ٹوئٹر ءَ کمپئیں چلائینگ بوتگ – کمپئین ءَ سیاسی ءُ چاگردی دگہ پگرے منوگراں بھر زرتگ –

ھمے وھد ءَ راشد حسین بلوچ ءِ گوھار فریدہ بلوچ ءَ ٹی بی پی ءِ اھوالکار ءِ گون ءَ گپ جنان ءَ گوشتگ کہ راشد حسین بلوچ ءِ درگت ءَ پاکستان ءُ متحدہ عرب امارات ءِ سرکار ءَ مارا ھچ وڑیں پسو نہ داتگ مارا راشد حسین زندے درگت ءَ ترس انت کہ ما پیش ءَ ھم گوشتگ –

فریدہ بلوچ ءَ گوشتگ کہ کمپئین ءِ مول ءُ مراد وتی توار ءَ دنیاء سرکنگ ءُ ما ھما وھد ءَ تان توار چست کن ایں دان مار ءَ انساپ مہ رس ایت –