آبرم لبزانکی گل پسنی ءِ نیمگ ءَ میر عمر میر ءِ شرپ ءَ دیوان بیتگ

سر بیتگیں ھالانی رد ءَ بلوچستان ءِ تیابدپی شھر پسنی ءَ آبرم لبزانکی گل پسنی ءِ نیمگ ءَ بلوچی زبان ءِ کلانیں شائر میر عمر میر ءِ شرپ ءَ یک دیوان ءِ برجم دارگ بیتگ –

دیوان دو بھر ءََ بیتگ، یک بھرے نبشتانکی ءُ دومی شَیری دیوان بیتگ، دیوان ءَ مزن نامیں شائر ءُ کواساں بھر زرتگ –

دیوان ءِ اولی بھر نبشتانکی ءَ بندات بیتگ کہ آئی ءِ تہ ءَ بلوچی زبان ءِ مزن نامیں شائر مبارک کازی ءُ عادل سجاد ءَ میر عمر میر ءِ زند ءُ ازم ءِ سر ءَ وتی لیکہ درشان کرتگ اَنت-

دیوان ءِ دومی بھر شائری بیتگ ءُ مزن نامیں شائراں وتی شَیر ونتگ ءُ دیوان ءِ مردم وتی نیمگ ءَ دلگوش کُرتگ اَنت –

دومی بھر ءَ شائری ءِ سر ءَ دیوان ءَ بلوچی زبان ءِ مزن نامیں شائر مبارک کازی، منیر مومن، زبیر مکتار، ڈولی بیگ، امیر دوست ءُ دگہ شائراں وتی شَیر ونتگ ءُ دیوان وشنود کرتگ –

دیوان ءَ دمگ ءَ بازیں کچے ءَ لبزانکی مردماں بھر زرتگ ءُ وتی ازم درشان کرتگ اَنت –

ابرم لبزانکی گل پسنی ءَ بندوکیں باسکے ءَ گوشت کہ اے گل ءِ دومی دیوان اِنت ءُ چریشی ءَ پیسر ھم گل ءَ یک دیوانے کرتگ –

آئی ءَ گوشت کہ ابرم لبزانکی گل پسنی گوستگیں سال دوھزار ءُ بیست ءَ جوڑ بیتگ ءُ دمگ ءِ تہ ءَ لبزانکی کاراں پرکار اِنت –