سندھ ءِ بنجاھی شھر کراچی ءَ وائس فار بلوچ مسنگ پرسنز ءِ نیمگ ءَ زھرشانی برجاہ – زھرشانی ءَ چار ھزار ءُ یک سد ءُ شست ءُ نُھ روچ سرجم بیتگ – چہ کراچی ءَ پروفیسر ڈاکٹر ریاض اھمد، چاگردی رسانکار نغمہ، وائس فار سندھی مسنگ پرسنز ءِ رھشون سسی لوھار ءَ بنجل ءِ تر ءُ تاب کرتگ ءُ کھولانی گون ءَ پدردی درشان کرتگ –
وی بی ایم پی ءِ رھشون ماما قدیر بلوچ ءَ گْوشت کہ بلوچستان ءَ ھمک روچ بلوچانی بیگواھی کنگ ءُ بندیگ جاھاں ترندیں لَٹ ءُ کُٹاں پد آیانی زانگول کرتگیں جونانی دزکپگ بنگلہ دیش ءَ پاکستانی پوج ءَ بنگالیانی نسل کُشی ءِ دھر نوک کرتگ – پاکستانی زوراکیانی پدر بیگ دنیا ءِ دیم ءَ اَنت بلے بدبھتی ءَ دنیا وتی واھشتاں گوں مانگیش اِتگ آیانی گور ءَ زیردستانی ھوناں گیش آیاں وتی واھشت دوستر بنت – آ وتی واھشتانی پژدر ءَ بے توار اَنت – ھمے رنگ ءَ پوڑی واریں رسانکدر درستاں وتی دیم ءَ نھاد ءُ کار ءُ بار دیم ءَ کرتگ ءُ رسانکدر وتی لوٹ ھم ڈیھاں گوں بندوک اَنت ھمے واستا اے واھشت پرستیں دنیا ءَ بلوچانی وڑیں زیردستیں راجانی توار چیر تر اِت ءُ گار بیت اے پوڑی واری دنیا ءَ کجام ھم راج ءِ سر ءَ بیوکیں زُلم دنیا ءِ واستا ءِ جوانی نہ دار اَنت کہ ھمود ءَ جانی تاکتورانی واھشت ءَ سان بند مہ بیت –
آئی ءَ گوشت کہ اے بلوچانی سیاسی پاٹیانی کار اِنت آ وتی وت ماں وتی جیڑاھاں یک گور بہ کن اَنت ءُ کم چہ کم بلوچ نسل کُشی، بلوچستان ءَ پوجی آپریشن ءُ بلوچ پُسگاں لشکر ءِ دست ءَ بیگواھی ءَ پد کوشانی جیڑھاں یکجاہ بہ بنت اگاں دگہ ھچ نہ بیت بلے یکجاھیں زھرشانی ءِ وَ بہ کن اَنت بلے بدبھتی ءَ اے جیڑھانی سر ءَ مئے دوست ءُ ھمبل یکجاہ نہ اَنت گڑا دنیا ءَ گوں چی گلگ –
ماما قدیر ءَ گڈسر ءَ گوشت کہ من اینکس الم گوش آں بلوچ نسل کُشی ءِ سر ءَ میان اُستمان ءُ دگہ ادارھانی بے تواری سرجمیں انسانیت ءِ واستا تاوان اِنت پرچاکہ زُلم ءِ سر ءَ بے توار بیگ گیش زُلم ودین اِت بلوچ الم پاکستانی زُلم ءِ تہ ءَ گوزگ اِنت بلے ایوک ءَ بلوچانی واستا بژنیگ نہ بیت سرجمیں دنیا ءِ واستا ناوشی ءِ مانشان اِت –