بیگواھیں مردمانی درگت ءَ

ٹی بی پی اھوال

بلوچستان ءِ جتا جتائیں ھند ءُ دمگاں پاکستانی پوج ءِ دست ءَ آوار جنگ بوتگیں مردماں دہ دہ سال ءَ گیش انت کہ انگت گار ءُ بیگواہ انت – آھانی ھچ وڑیں ھال ءُ اھوال نیست – آوار جنی ءَ پد چیریں زنداناں بندیگ کنگ بنت ءُ ناکہ آ آمیدگس ءَ آرگ بنت ءُ ناکہ آھانی کھول ءِ مردماں آھانی درگت ءَ گوشگ بیت –

حسان کمبرانی ءُ حزب اللہ کمبرانی ءَ یازدہ ماہ سرجم بوتگ کہ پاکستانی چیریں زندانی تہ ءَ بندیگ انت حسان ءُ حزب اللہ کمبرانی شال کمبرانی دگ ءِ سر ءَ آوار جنگ ءُ بیگواہ کنگ بوتگ انت ـ حسان ءُ حزب اللہ کمبرانی ءِ بانکیں گوھار ءَ پہ وتی براتانی آجوئی ءِ ھاتر ءَ سرکار ءِ در ٹک اتگ اَنت بلے آھانی نیمگ ءَ روچ مروچی ھچ وڑیں گپ دست ءَ دیگ نہ بوتگ ـ آئی ءِ گوشگ انت اگاں آئی ءِ برات جرم ءَ ھوار انت گڑا کانودی رِد ءَ آمیدگس ءَ آرگ بہ بنت ـ

سَے جولائی دوھزار ءُ پانزدہ ءَ بلوچستان ءِ تیاب دپی دمگ گوادر ءَ پاکستانی پوج ءِ دست ءَ آوار جنگ ءُ بیگواہ بوتگیں بلوچی زبان ءِ شائر عظیم بلوچ ء دوست محمد ءَ پنچ سال ءَ برز انت تھاریں زندان جاھاں بندیگ انت – آئی ءِ درگت ءَ آئی ءِ بلک ءُ پہ وتی نماسگ ءِ ھاتر ءَ یک تامری کلوہ جوڑ کرتگ ءُ چاگردی رسانکدراں شنگ کرتگ – آئی ءِ گوشگ انت کہ عظیم ءِ بیگواھی ءَ آئی ءِ کھول بازیں پریشانی ءُ اڑ ءُ جنجالاں گون دچار انت – آئی ءَ لوٹ کتگ کہ اگاں آئی ءِ نماسگ ءَ ردی ءِ کُتگ آمیدگس ءَ آرگ بہ بیت ءُ سزا دیگ بہ بیت ھر سزا آمیدگس بندیت مارا کبول انت – بلے منی نماسگ زاھر کنگ بہ بیت – اے وڑ آئی ءِ گار ءُ بیگواہ کنگ مئے گوم ءَ زوراکی یے –

یازدہ جنوری دوھزار ءُ چاردہ ءَ چہ ھزدار ءَ پاکستانی پوج ءِ دست ءَ زورانسری آوار جنگ ءُ بیگواہ بوتگیں چنگیز محمد حسنی ء محمدعلی ءَ ھپت سال سرجم انت کہ گار ءُ بیگواہ انت – آئی ءِ مات ءَ چہ ملک ءِ ھاکماں لوٹ کتگ کہ آئی ءِ چک ءَ ھپت سال سرجم انت کہ بیگواہ انت آ یل کنگ بہ بیت ما چہ مازگی ازیتاں بہ رکیں –

پنچ دسمبر دوھزار ءُ دوازدہ ءَ شال مشن دگ ءِ سر ءَ پاکستانی پوج ءِ دست ءَ زورانسری آوار جنگ ءُ بیگواہ بوتگیں گدو خان ء دلدار خان بگٹی ءَ ھشت سال سرجم انت کہ چیریں ازیت جاھاں بندیگ انت – آئی ءِ چُک ءِ گوشگ انت کہ پت ءِ یل کنائینگے ھاتر ءَ آئی ءَ درسیں کانودی در ٹک اتگ انت – بلے آئی ءِ گوم ءَ ھک کنگ نہ بوگ ءَ انت آئی ءَ گوشتگ کہ ریاست ءِ اے کانودی زمہ واری اِنت کہ وتی شھریاں ھک ءُ انساپ بہ دنت –

کلی کونگھڑ مستونگ ءِ جھمنند سعید احمد ءِ حبیب اللہ شاھوانی ءَ ھپت سال ءَ گیش انت کہ بیگواہ انت آ وت سرکاری کاردار ءِ ھم بوتگ، لیویز فورس ءَ کار ءَ بوتگ کہ پاکستانی پوج ءَ سال دوھزار ءُ سینزدہ وتی سیادے ءِ گوم ءَ شال ءَ چہ مستونگ ءَ آیگ ءَ بوتگ کہ لدھا ءِ نزیک ءَ آوار جنگ بوتگ – گوستگیں سال ءَ آئی ءِ سیاد یل بوتگ بلے آئی ءِ جند دنیگت ءَ گار انت – آئی ءِ کھول ءَ لوٹ کتگ کہ آ یل کنگ بہ بیت –

بلوچستان ءِ تیابدپی دمگ پسنی ءَ پاکستانی پوج ءِ دست ءَ زورانسری آوار جنگ بوتگیں بولان کریم ءَ ھشت سال سرجم انت کہ روچ ء مروچی بیگواہ انت – آئی ءَ کھول ءَ چہ ھاکم ءُ ملکی ادارھاں چہ لوٹ کتگ کہ آ دیم ءَ آرگ بہ بیت –

بیگواھیں نودربر فیروز بلوچ ءَ سالے ءُ ھپت ماہ انت کہ پاکستانی پوج ءَ زورانسری آوار جتگ ءُ بیگواہ کتگ – آئی ءِ گوھار ءَ چہ ملکے ھاکماں لوٹ کتگ کہ آ دیم ءَ آرگ بہ بیت آئی ءَ اگاں جرمے کتگ آمیدگس ءَ آرگ بہ بیت – آئی ءَ گوشتگ کہ ما نزاناں مئے برات ءِ ھال چی انت ـ اے وڑ ما زھنی نادراہ جوڑ بوگ ءَ انت –

شعیب بلوچ ء لال محمد جھمنند مند گیاب کہ بیست چار مئی دو ھزار ءُ سینزدہ ءَ پاکستانی پوج ءَ مند ءَ مندیگ کور ءَ گوبرد ءَ روگ ءِ وھد ءَ آوار جتگ ءُ بیگواہ کتگ کہ ھشت سال انت بیگواہ اِنت – آئی پت ءَ بازیں سرکاری در ٹکتگ ءُ وتی چک ءِ لوٹ کتگ بلے آئی ءَ ھچ وڑیں پسو دیگ نہ بوتگ ناکہ آئی ءِ چک دیم ءَ آرگ بوتگ – آئی ءِ پت چک راہ ءَ چاران ءُ اے دنیائِے یل کتگ ءُ آئی مات ھم پیر ءُ آجز انت وتی چک ءِ راہ ءَ چارگ انت-

گوستگیں سال ءَ دوھزار بیست ءَ پاکستانی پوج ءَ وحید بلوچ ء الھی بخش جھمنند جاؤ ڈولجی وتی پانگس ءَ برتگ اَت ءُ پد ءَ دوبر آئی ءِ ھچ ھال نہ بیت – آئی ءِ گار بیگ ءَ پد آئی ءِ کھول ءَ وحید ءِ پد جنگ ءَ ڈیھی ادارھانی گور ءَ دست چِست کت اَنت ءُ گوشت اگاں وحید بلوچ کتکار انت آ ملکی کانودانی رِد ءَ سزا دیگ بہ بیت –

بلے آئی ءِ کھول ءِ گپ ڈیھی کانوداراں وتی گوشانی تہ ءَ گوازینت ءُ در کُت اَنت ءُ آیانی گپ گوات ءَ برت اَنت وحید تنی وھدی گار اِنت –

سال دوھزار ءُ بیست ءَ ھپت مارچ ءَ مند ءِ دمگ گوبرد ءَ لشکر کشی ءِ میان ءَ پاکستانی پوج ءَ پرویز ءِ رسول بخش آوار جتگ اَت ءُ گوں وت برتگ اَت – کہ روچ ء مروچی گار بیگواہ انت – آئی ءِ کھول ءِ رِد ءَ پرویز کسانیں ورنایے ءُ آئی ءِ اُمر ھژدہ سال انت، اشی ءَ پیش آ یک رندے پیسر ءَ ھم پاکستانی پوج ءَ چہ گوادر ءَ آوار جتگ ءُ پد ءَ یل داتگ اَت –
آئی ءِ کھول ءِ رِد ءَ آئی ءِ مستریں برات وارث ءُ زبیر بلوچ ھم پاکستانی پوج ءَ جتگ ءُ کُشتگ اَنت آھانی کستریں برات آوار جتگ ءُ برتگ آئی ءَ گوں ھچ وڑیں سیاسی ءُ دگہ گلاں واستا نیست اگاں سرکار ءَ آئی ءِ سر ءَ شک انت گڑا آمیدگس ءَ بیاریت ءِ ھر سزا دیگ بیت کانود رِد ءَ دئیگ بہ بیت –

سال دوھزار ءُ ھبدہ ءَ بیست اکتوبر ءَ پاکستانی پوج ءَ بلوچستان ءِ دمگ مستونگ دتو ءَ حفیظ ء محمد اعظم آوار جتگ ءُ گوں وت برتگ اَت کہ انگت بیگواہ انت – آئی اجزیں مات ءَ چہ ملکی ادارہ ءُ ھاکماں لوٹ کتگ اَت کہ آ دیم ءَ آرگ بہ بیت –

گوستگیں سال دوھزار ءُ بیست ءَ آواران ءِ دمگ کلر مشکے ءَ چہ پاکستانی پوج ءِ دست ء آوار جنگ بوتگیں نجیب اللہ حضور بخش ءِ کھول ءَ لوٹ کتگ کہ آھانی زھگ بیست ءُ پنچ نومبر ءَ شال داں کراچی رؤگ ءِ وھد ءَ چست کنگ بوتگ – اگاں آئی جرمے کتگ کانود رِد ءَ سزا دیگ بہ بیت گار کنگ مہ بیت –

نِی بلوچستان ءِ گار ءُ بیگواھیں مردم زنداناں زندگ اَنت یا کُشگ ءُ جون جنگل ءُ گیاباناں چگل دیگ بیتگ ایشی ءَ اشی ءِ راستی تنی وھدی تچک ءَ پدر نہ بیتگ بلے یک گپے مردم ءَ راستی ءِ نیمگ ءَ بارت کہ بلوچستان ءَ بازیں جونانی دزکپگ ءَ مردمانی گمان ءَ کشان کنت کہ بازیں مردمے زنداناں جنگ ءُ جون ناپجاری ءَ دور دیگ بیتگ اَنت –