نبشتانک: سُھریں موت
نبشتہ کار: ایڈگر ایلن پو
رجانک کار: رفیع شاکر
دی بلوچستان پوسٹ
تیوگیں ملک ءَ سُھریں مَرگ تالان اَت، سھریں موت، شھر پہ شھر، میتگ پہ میتگ تالاں بوھگ ءَ اَت، کس چہ ایشی نہ رک اِتگ اَت۔ھِچ کُشوک ئِے اے پیم ترس نہ بوتگ، نہ جلاد چُش رستر بوتگ اِنت۔ سھریں موت ءَ ھر دماں ءَ وار ءَ کُت، اناگہ بے تْرِک ءُ توار۔ ایشی شکار بوتگیں مردماں ءَ زوراکیں دردے ءَ زُرت ءُ سر چکرّگ ءَ لگ اِت، چہ ایشی پد ھما بیمناکیں نشانی ودی ءَ بوت کہ چہ ھمائی سَوب ءَ اے ڈکّے(وبا) نام “سُھریں مرگ” ایر بوتگ اَت۔ ایشی شکار بوتگینانی ھون ڈنّ ءَ تَچت اَنت، باز بیمناکیں ھالتے اَت۔ انچُش سما ءَ بوت کہ تیوگیں بدن ءِ سِلے تہ ءَ کڑک جوڑ بوتگ اَنت ءُ ھون چہ ھر یک کڑک ءَ تچگ ءَ اِنت۔ اے چارگے ھِچ وڑ ءَ نہ اَت کہ مردم زمین ءِ سر ءَ تچک ءَ بوت ءُ دردے زوراکی یے سَوب ءَ کوکار ءَ لگ اِت نیم کلاک ءِ تہ ءَ آیاں ئِے ساہ ءَ تنگی ءَ کُت ءُ مُرت اَنت۔ مُرتگینانی دیم چہ ھون ءَ سُھر ءَ بوت، پرچے کہ ھمے سھریں موت ءِ نشانی اَت۔ کَسے ءَ نہ زانت ایشی سوب چی اِنت، کَسے ءَ نہ زانت ایشی الاج ءَ چوں بہ کن اَنت۔
کَس ءَ را مالوم نہ اَت کہ آ دومی اُرش ءَ کجا ءُ کئی سَر ءَ کنت۔ مردم ھر وھد ءَ ھمیشی تُرس ءُ ازابے تہ ءَ اَت اَنت۔بلے یک انچُشیں بامردے ھم ھست کہ آئی ءَ را سھریں موت ءِ بابت ءَ ھِچ پروا نیست اَت۔ آئی نام اَت شھزادگ پروسپرو۔ مالدار ءُ سیل ءُ سواد ءِ شوکی، شھزادگ وتی وشھالیں زندگی ءَ ھمے وڑ گوازینگ ءَ اَت ءُ چارین نیمگ ءَ مھلوک مَرگ ءِ وردن جوڑ بوھگ ءَ اَت اَنت۔ شھزادگ ءَ گشئے بلکیں ھِچ مالوم نہ اَت۔
سھریں موت مردماں ءَ ایر برگ ءَ اَت۔ رَند ءَ شھزادگ ءَ را اندازگ بوت کہ آئی چہ نیم ءَ گیش نوکر، ھِزمتکار مُرتگ اَنت ءُ آئی بازیں سنگتے اوں مرتگ۔بلے تُرس ءُ گم ءِ پدرا کنگ ءَ ابید شھزادگ ءَ اے ھال اِشکُت ءُ وتی ھاسیں اندازے ءَ نہ مَن اِت ئے ءُ گُشت ئے کہ “من سک مزنیں داوتے کن آں۔
کہ داں شش ماہ آ رواں بیت، اوْد ءَ ما چہ اے بیکاریں جنجال ءَ بے ھال بہ ایں، پمیشکا شھزادگ ءَ دربارے مالدار ءُ سرداراں ءُ آیانی جنیناں ءَ آیگ ءِ کلوہ دیم دات۔
آئی گُشت “ما چہ اے گمیگ ءُ پُرسیگیں شھر ءَ ڈنّ ءَ در کاھیں،
“گانو منی ماڑی اِنت، ما ھمود ءَ رو ایں۔”
دربار ءِ مردمانی ھاتر ءَ چہ ایشی مستریں وشی یے گپ چے ءَ بوت کہ آ اوں شھزادگ ءِ پُشت ءَ آئی ماڑی ءَ رونت کہ آ چہ شھر ءَ ڈن اِنت، درستانی ھیال اَت اود ءَ سر بوھگ ءَ آ چہ سھریں موت ءَ رَکّ بنت ءُ آئی ءَ بے ھال کن اَنت۔شھزادگ ءِ ماڑی سک ڈولدار اَت۔سک بُرز ءُ کوھن بلے اینگر ءُ آنگُر ویرانی یے سَوب ءَ چٹ بے توار ودی ءَ بوت۔
آئی چاریں نیمگ ءَ بُرز ءُ زورمندیں دیوال اتاں آیاں آھِن ءِ دروازگ سَک اَت۔ ھردیں کہ توامیں مردم پُترِت اَنت گڑا شھزادگ ءَ ھکم دات کہ دروازگ ءَ بند بہ کن اِت ءُ کبل بہ جن اِت۔ نون سُھریں موت اِد ءَ آتک نہ کنت۔ آئی کندت ءُ گُشت
“ایدگہ دگنیا گوں سُھریں موت ءَ جنگ بہ دنت” آئی سنگتاں اوں گُشت انچُش اِنت۔ دروازگ بند کنگ بوت اَنت ءُ کبل جنگ بوت اَنت۔
ماڑی یے تہ ءَ شھزادگ ءَ باز روچے ھاتر ءَ وردِن ھوار آورتگ اَت۔ ورگے ءُ نوش کنگے ھاتر ءَ سک باز سامان ھست اَت۔ نوکر ءُ چاکر باز اِتاں کہ مھماناں ءِ کسان کسانیں زلورتانی ھیالداری اِش ءَ کُت، سازندہ ءُ گُشندہ گوں اَت کہ ھر روچ شام ءَ مجلس ءَ گرم بہ دے اَنت۔وانگ ءِ ھاتر ءَ کتاب ءُ کلاگ بندوکیں مردم ھم ھست اَت کہ مردماں ءَ بہ کندیں اَنت، دگہ چی یے کمی اَت؟ درستینانی ھیال اَت کہ تانکہ ڈَکّے زور نہ پُرش ایت وھدے گوازینگ ءِ چہ ایشی شَرتریں راہ نیست، ءُ نہ چہ ایشی شریں جاگہ۔ اِد ءَ ماڑی یے تہ ءَ ھر مردم وش ءُ دلجم ءُ رَکِیتگ اَت۔اے داوت داں شش ماہ رواں بوت۔ کدی کدی شھزادگ ءَ را ھال ءَ رست کہ سُھریں موت ءَ سرجمیں ڈیھ ءَ را چیر ترینتگ ایشی بیم گیشتر بوتگ۔ چُشیں ھالاں مھمانانی تَب ءَ ھِچ پرک کپگ ءَ نہ اَت۔ آ تیوگیں روچ ءَ گوں ورگ ءُ چرگ ءُ وش گپی ءَ گٹ اِتاں۔ آیاں ءَ رنج ھست اَت گڑا بس ھمیش کہ چہ کَچ ءَ گیش سَیل ءُ سوات ءَ تنگ بوھگ ءَ اِتاں۔آیاں ئِے بیزاری یے دور کنگ ءِ ھاتر ءَ شھزادگ ءَ دگہ یک تماشا یے درگیج اِت۔ آئی وتی مھماناں ءَ گشت کہ ما بوک(دبوکو) کن ایں ءُ ناچ کن ایں۔ ما سک مزنیں کساسے ءَ چُشیں ناچی مراگش کن ایں کہ آئی تہ ءَ درست مھمان وتی رنگ ءُ دروشم ءَ بدل کن اَنت ءُ کاینت ءُ درستیں مھمان اے مراگش ءَ بھر زور بنت۔ ماڑی یے درستیں مھمانانی دلاں ءَ وشی یے تالان بوت۔ دربار ءِ سردار ءُ آیانی جنین سک وش بوت اَنت ءُ ھمے سوچ ءَ لگ اتاں کہ آ کجام رنگ ءُ دروشم ءَ رونت ءُ تیاری یے بندات بوت۔رَند ءَ ھما روچ آتک کہ گوش پردہ پوشی ءَ ناچ کنگی اَت، ماڑی یے کوھنیں بھر ءَ ھپت پراہ ءُ دراجیں ناچ جاہ ھست اَت، شھزادگ ءَ پیسلہ کُت کہ ناچ ھمیشانی توک ءَ بیت۔ ناچے ھاتر ءَ کارمرد بوتگیں اے کوٹی رند پہ رند ءَ جوڑ اِتاں۔ءُ آیانی دراجیں دریگ نزیکیں کوچگے نیمگ ءَ پَچ ءَ بوت اَنت، دگہ یک راھے نیمگ ءَ اوں پچ ءَ بوت اَنت بلے آئی ءَ را بند اِش کُت اَت۔ کوٹیانی رُژناھی یے ھاتر ءَ دیوالانی سر ءَ ڈیوا ایر اَت۔ چراگ کہ رژناہ ءَ بوت اَنت چہ آس ءِ روکی ءَ یک اجبیں مارشتے پیدا ءَ بوت۔ ھر کوٹی یے در ءُ دیوال جتا جتاھیں رنگے اَت اَنت۔ءُ ھما رنگے پردگ ءُ دیوال ءِ سر ءَ جتگیں مزن مزنیں اکساں کوٹیانی زیباھی گیش ءُ گیوار کُتگ اَت۔ اولی کوٹی نیل اَت، دومی کوٹی سُھر اَت، سَیمی سبز، چارمی زرد، پنچمی اسپیت ءُ ششمی سُبک ناسی۔ ھر کوٹی یے بارگ ءُ دراجیں دریگانی رنگے شیشگ سک اَت کہ آیانی رنگ دیوالاں ءِ رنگاں ءِ وڑیں اَت۔کوٹیاں اے پیم ءَ سینگارگ اوں چونیں اجبیں گپے۔
یک زالے ءَ گُشت
“شھزادگ ءِ شوک بے مٹ اِنت۔۔”
بلے ھپتمی کوٹی اَنچوش اَت کہ اود ءَ درستیں مھماناں ءَ چہ کُلّاں زیادہ اجب ءَ لگ اِت انت۔اے کوٹی یے دیوال سیاہ پوش ودی ءَ بوت اَنت۔ زنڈیں سیاھیں ءُ نرمیں کمبلانی سر ءَ جور کُتگیں اکساں ءِ دراجی تاں ڈگار ءَ آتک اَت اَنت۔جھل ءَ سیاھیں رنگے گالی تالان ات اَت۔ ایوک ءَ ھمے کوٹی اَت کہ اود ءَ دریگاں ءِ رنگ کوٹی یے دیوالانی وڑ ءَ سیاہ نہ اَت۔ سیاھیں رنگے جاگہ ءَ درستیں دریگانی رنگ سُھر اَت۔ انچو سھر کہ ھون__!
اے ھپتمی کوٹی ءَ یک دگہ چیزے اجب اَت، گوں یک دیوالے ءَ یک مزنیں گڑیالے جتگ اَت کہ آ چہ سیاھیں ءُ وزنی ایں درچکے ءَ جوڑ اَت۔ آئی نام ءُ سوچِن سُھرے اَت اَنت۔ آئی پدی ءُ دیمی شُتگیں دماناں ءِ ھساب ءَ داشت۔ بلے ھردیں کہ کلاک سرجم بوتیں گڑا آئی توک ءَ اَنچیں توارے آتک کہ درستیں ناچ کنوک اجکّہ ءَ بوت اَنت۔ آیاں ءِ دیمے رنگ ءَ پَر اِت۔ سازگِراں سرونزاں ءَ وتی دستاں بے ھال ءَ کُت ءُ مِنڈی مِنڈی یکے دومی یے نیمگ ءَ چار اِت اِش۔ آیاں دل ءِ تہ ءَ ھمے سوگند ءَ کُت کہ اگاں دیمے کلاک سرجم بیت گڑا آ نہ ترس اَنت۔ بلے ھر رَند ءَ انچْوش ءَ بوت کہ کلاک سرجم بوھگ ءِ وھد نزیک ءَ بوت آیانی دل ءَ یک ترسے پیدا ءَ بوت۔ بلے اے اجبیں، تھاریں ھپتمی کوٹی ءُ اے گڑیالے بیمناکیں توار ءَ ابید۔ ناچ رواں اَت۔وشی یے موہ اَت۔مردماں نوک نوکیں دروشم جوڑ کتگ اَت ءُ وڑ وڑیں گُد گورا کُتگ اَت۔ ءُ چراگانی روژناھی ءَ ناچ ءِ جاگہ ءَ انچو گردگ ءَ اِتاں گُشئے آزمان ءَ بال کنگ ءَ اَنت۔ کندگ ءُ ٹھکاں ءِ تواراں ششیں کوٹیاں ءَ پہ سر ءُ بُن زرتگ اَت۔ بلے ھرکجام مھمان ءِ چم ھپتمی کوٹی ءَ کپت، آئی دوبر آنگو دیم ءَ کُت۔
شھزادگ اے دیوان ءَ چہ درستاں گیش مزگ زورگ ءَ اَت۔ انچو گمان ءَ بوت کہ ھر چہ درستاں گیش وش اِنت۔ آئی وَ تب انچوش اَت۔
“ھرچی شَر اِنت نا؟” آ ھر یک مھمان ءِ کرّ ءَ شُت ءُ جُستے کُت۔
تو چے ورگ لوٹ ئے؟ آ مھماناں ءِ سک ھیالداری کنگ ءَ اَت۔ آ ھر نیمگ ءَ ودی ءَ بوت۔ بوک والا ناچ واکی سک کامیاب روگ ءَ اَت۔ چنچو سال اِنت کہ چُشیں تاھیریں مراگش نہ بوتگ۔
وشیانی موہ ءَ گشئے وھد سک گوں تیزی ءَ روگ ءَ اَت انچو گمان ءَ بوت کہ وھد ءَ را بانزل سک اَت ءُ بال ءَ اَت۔ اے دیوان ءِ مھمان اوں ھیران بوت اَنت۔ وھدے کہ ھپتمی کوٹی یے گڑیال ءَ شپے نیم ءَ توار جَت۔ آئی توار چہ پیسرے تواراں گیشتر بیمناک اَت۔ یک دو سَے چارمی توار ءَ سازگراں سازے جنگ بند کُت۔مھمان گوں بے تواری ءَ آئی آواز ءَ گوش دارگ ءَ اِتاں۔ پنچ ،شَش، ھپت۔۔ آئی توار چہ ھپتمی کوٹی ءَ آیگ ءَ اَت ءُ تیوگیں ماڑی ءَ تالان بوھگ ءَ اَت۔ توار بہ دیوالاں کپت ءُ پدی گوشاں ءَ کپت۔ بلکیں پمیشکا کہ توامیں مردم ھاموش ءَ اوشتاتگ ات اَنت۔یا بوت کنت پمیشکا کہ چاریں نیمگاں ھاموشی اَت۔ بلے سَوب ھرچی بہ بیت۔ گڑیال ءَ کہ دوازدہ کلاکے توار جَت درست گُنگ بوت اَنت۔ پدا اناگہ چہ اولی کوٹی ءَ اجبیں توار چست بوت ءُ سُکسُکانی توار تالان بوت۔ بَھمانگی سَوب ایش اَت کہ ناچی جاھے درنیام ءَ زمین ءَ یک دبوکیں مردمے اَت۔آئی ءَ را چِداں پیسر کَس ءَ نہ دیستگ اَت ءُ ھرکس ءَ آئی ءَ را چارت آئی بَھمانگی بہ تُرس ءِ تہ ءَ بدل ءَ بوت۔ھرکس ءِ چم کہ بہ آئی کپت چہ تُرس ءَ کوکارے جَت ئے۔
شھزادگ ءَ وتی مھماناں ءَ اے گُشتگ اَت کہ رنگ رنگیں چِھرگ سمبھین اِت ءُ وڑ وڑیں گُد گورا بہ کن اِت ءُ بیا اِت۔ آ ڈولدار بہ بنت اجبیں یا کَندینوکیں۔
بلے اے۔۔ اے چہ کَچ ءَ گیش بوت۔ باور نہ بیت کہ چو ھم بوت کنت۔۔!!
آ دراجیں پردہ پوش ناچ ءِ جاگہ ءَ پرشے نیام ءَ ایوک ءَ اوشتات اَت ءُ آئی کوپگانی سر ءَ سُرمگی ایں کوٹے اَت۔ آئی ھما نکاب وتی دیم ءَ بستگ اَت آ لاش ءِ وڑیں ءِ اَت۔ انچُش لگ اِت کہ آ انوں چہ کبر ءَ پاد آتک ءَ ءُ اِد ءَ آتکگ۔ بلکیں مھمان اے گُد ءُ بُوکّ ءَ پمیشکا ءَ برداشت کنگ ءَ اِتاں کہ ھر مھمان ءَ اے گُد گورا کُتگ اَنت ءُ چُشیں نکابے بستگ، بوت کنت آئی مسکرا کمو بیمناک اِنت۔ بلے اے نکابے یک گپے اجب اَت۔آ لاش ءِ نکاب ءِ سر ءَ سُھریں نشان ھست اَت۔ ھون ءِ نشان سُھریں موت ءِ نشان۔۔!!
شھزادگ دومی کوٹی یے تہ ءَ اَت۔آ اے کوٹی یے تہ ءَ آتک کہ جست بہ کنت پرچے چو ھاموش اِنت۔ ھروھدے کہ آئی پردہ پوش ءَ را دیست سک زھر گپت۔
کجام ناپرمان اِنت کہ آ اے وڑ ءَ منی ءُ منی مھماناں ءِ بے ازتی ءَ کنگ ءَ اِنت؟ آئی کوکار کُت۔۔ کجام بدبھت اِنت کہ آ منی ماڑی یے تہ ءَ چُشیں بے شرپی کنگ ءَ اِنت؟
یک ءُ دو مھمان دیمی آتک بلے آ نکاب پوش وت بے تِرک ءُ توار دیمی آیگ ءَ اَت۔ ھما نیمگ ءَ کہ شھزادگ اوشتاتگ اَت۔ ھما مھمان کہ آئی ءَ دارگ ءِ ھاتر ءَ دیمی آتک دو چار کدم دیمی آتک پدا اوشتات۔ آئی پاد لرزگ ءَ لگ اِتاں ءُ چہ تُرس ءِ سَوب ءَ ھُشک بوت۔ کَسے ءَ سَگ ءُ اوپار نیست اَت کہ آئی ءَ داشت بہ کنت آ پردہ پوش ابید چہ کَس ءِ دارگ ءَ۔ چہ ناچ جاہ ءَ بہ دومی ناچ جاہ ءَ گوست ءُ ھپتمی کوٹی یے دروازگ ءَ اوشتات۔شھزادگ پروسپرو نون وتی بھمانگی ایر بُرتگ اَت۔ آئی وتی ھَنجر کَش اِت زھر گِپت اَت ءُ آئی نمیگ ءَ روگ ءَ اَت۔شھزادگ ھردیں کہ پردہ پوش ءِ نیمگ ءَ تَر اِت گڑا پردہ پوش ءَ وتی دیم ھمائی نیمگ ءَ کُت۔مھماناں کوکار اِشکُت۔ باز دردناکیں کوکارے اَت۔ھَنجر چہ شھزادگ ءِ دست ءَ کپت ءُ ھَنجر ءَ ھوار شھزادگ اوں جھل ءَ کپت۔ آئی جان سرد بوتگ اَت ءُ آئی دیمے سر ءَ ھون ءِ سُھریں نشان ھست اَت۔ چیزے دمان درستیں مھمان اجکہ اَت اَنت۔کَس چہ وتی جاگہ ءَ نہ سُر اِت۔پدا دو بامرداں دل کت ءُ سیاھیں کوٹی یے نیمگ ءَ شُت اَت۔آ درآمدیں پردہ پوشیں مھمان گڑیال ءِ دیم اوشتاتگ اَت۔ یک مردمے ءَ آئی کوٹ چِک اِت ءُ آئی نکابے دور کُت۔چہ کس ءِ دپ ءَ توارے در نیتک۔کَسے ءَ چمے اوں نہ جَت۔پمیشکا کہ آئی کوٹ ءُ نکابے تہ ءَ ھِچ نیست اَت۔ کَس نہ اَت، ھچ کَس نہ۔ ھالیگیں کوٹ ءُ نکاب سیاھیں پرش ءِ سر ءَ کپت اَت اَنت۔یک یک ءَ مھماناں ءِ سر ءَ راست زاھر بوت۔ءُ چہ تُرس ءِ سَوب ءَ کَس ءَ ھچ گُشت نہ کُت۔سازندہ ءُ نوکر اوں سرپد اتاں۔ دُزّ ءِ وڑ ءَ چیروکائی سُھریں موت اود ءَ رست اَت۔ماڑی یے مزنین دیوالاں آئی ءَ جَلَّگ ءَ سوب مند نہ بوت اَنت۔آ پردہ پوش اے ناچ ءَ درآمدیں مھمان ءِ وڑ ءَ ساڑی اَت۔ءُ پدا مرگ ءَ وتی ناچ باندات کُت۔آ چہ ھر کجا گوست اَت ، مردماں چہ دردے زوراکی یے سَوب ءَ کوکار کنگ ءَ لگ اِتاں پرش ءِ سر ءَ کپگ ءَ اِتاں۔نیم کلاکے تہ ءَ ناچ جاھے پرش کہ آ ساز ءُ سامان ءُ چہ مھماناں ءِ کندگ ءُ ٹھکاں لرزگ ءَ اَت۔انوں مرگ ءِ بازار جوڑ اَت ءُ چہ لاش ءَ پُر اَت۔ چہ لاشانی چِھرگ ءَ ھون تچگ ءَ اَت۔۔۔
ھردیں اے دیوان ءِ گُڈی مھمان اوں موت ءِ شکار بوت گڑا گڑیال ءِ سُھر ءِ سوچِن وت ءَ وت اوشتات۔ ماڑی یے دیوالاں روشناھیں چراگانی جَل تیز بوت ءُ مُرت اَنت۔۔
نوں چاریں نیمگاں تھارمئی اَت تباھی ءُ سُھریں موت ءِ بادشاھی ۔۔۔۔!!
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔