مچھ وئیل: زھرشانی کنوک سرکار ءِ میان ءَ گپ ءُ تران سوبمند بیتگ، عمران شال ءَ رؤت اِت اِنت

دی بلوچستان پوسٹ

سرکاری ٹولی ءُ مچھ وئیل ءِ ھلاپ ءَ زھرشانی کنوکانی گپ ءُ تران سرجم بیتگ، سروزیر عمران خان ءَ شال ءِ آیگ ءِ چن ءُ لانچ کرتگ وھدیکہ مچھ وئیل ءَ بیران بیتگیں مردمانی کھولاں جونانی کَل ءُ کسارات کنگ ءَ رازیگ بیتگ اَنت –

سر وزیر بلوچستان جام کمال،بنجاھی پتر ءِ وزیر علی زیدی ءُ قاسم سوری شپ ءَ شال ءَ نندانک ءَ نشگیں مردماں گون ءَ گپ ءُ تران ءَ سر بیتگ اَنت اود ءَ شھیدانی کمیٹی ءِ گون ءَ گپ ءُ تران ءَ پد کھولانی جونانی کَل کنگ ءِ جار جتگ –

دمگی ٹی وی ءِ رپورٹ ءِ رد ءَ سروزیر عمران خان ھم شال ءِ روگ ءِ ھال اِنت وھدیکپ بنجاھی پتر ءِ وزیر علی ءُ سرکار ءِ ٹولی پیسر ءَ ساجو بیتگ اَنت –

زانگ بہ بیت مچھ وئیل ءَ زھرشانی کنوک گوستگیں شش روچاں زھرشانی نندانک نندوک بیتگ اَنت آیانی لوٹ بیتگ کہ دانکہ ڈیھ ءِ مزن وزیر آیانی ھواریں لوٹ آں سرجم نک کنگ آ جونانی ھمراھی ءَ شال ءَ زھرشانی برجاہ مان اِت –

چریشی ءَ پیسر اُستانی سرکار ءَ بنجاھی پتر ءِ سرکار ءِ نیمگ ءَ سَے رند ءَ کھولانی گون ءَ گپ ءُ تران بے سوب بیتگ کھول گوستگیں شش روچاں سارتی ءَ نندوک بیتگ تاں مروچی سرکار ءُ زھرشانی کنوکانہ گپ ءُ تران سوب بیتگ –

مچھ وئیل ءَ یازدہ کاریزکارانی بیرانی ءَ پد بیران بیتگیں مردمانی کھول ءُ شیعہ گلانی نیمگ ءَ بلوچستان ءَ ھوار پاکستان ءَ زھدشانی نندانکاں نشتوک بیتگ اَنت، وھدیکہ شال ءَ زھرشانی ءَ جاڑیگیں شھیدانی کمیٹی ءَ سرکار ءَ ھشت شرت ایر کرتگ اَنت –

شرتانی تہ ءَ شیعھانی پھریزگ ءُ بیگواھیں شیعھانی یلہ کنگ ءَ ھوار بیران بیتگیں مردمانی کھولاں ھون دیگ ءُ جتا جتائیں شرت ھوار بیتگ اَنت –