کراچی ءَ بیگواھیں مردمانی ھاتر ءَ زھرشانی برجاہ

بیگواھیں مردمانی ھاتر ءَ بوکیں جد ءُ جھد ءَ پاکستان ءِ مکاریں دیم پدر کُتگ- ماما قدیر بلوچ

دی بلوچستان پوسٹ

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ یک سد ءُ ھشتاد ءُ پنچ روچ سرجم بوتگ –
زھرشانی بنجل ءَ ایکٹوسٹ حوران بلوچ، ءُ ماھگنج بلوچ ءُ وھاب بلوچ ھم ساڑی بوتگ انت –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گون ءَ باوست کنان ءَ گوشتگ کہ بیگواھیں مردمانی کھولاں ناکہ تھنا پاکستانی جمھوریت ءِ بلکیں انسانی ھکانی ادارھاں ھوار رسانکدر ءُ راجداریں گلانی بے بسی چم وت دیستگ انت –

بیگواھیں مردمانی یل کنائینگے شاھگانیں جد ءُ جھد ءَ ناکہ راجدپتر نبشتہ بلکیں دنیا ءِ دیما پاکستان ءِ مکاریں دیم ھم پدر کتگ – بلے اے درسیں چیزاں ابید میان اُستمان بیگواھیں مردمانی یل کنائینگ ءَ دنیگت ءَ بے سوب انت – میان استمان ءَ لوٹ ایت کہ آ بیگواھیں مردمانی کھولانی چیھالاں ایش بہ کنت –

ماما قدیر بلوچ ءَ گوشتگ کہ پاکستانی ھاکم بلوچانی پُرایمنیں جد ءُ جھد ءَ چہ تُرسگ ءَ انت کہ بلوچانی پُرایمنیں جد ءُ جھد آؤکیں روچاں پاکستان ءِ ھاتر ءَ شرمندگی جوڑ بیت پرچاکہ آؤکیں روچاں بیگواھیں مردمانی یل کنائینگے ھاتر ءَ چست بؤکیں توار میان اُستمان ءَ مھکم بیت-