مچھ ءِ وئیل: شیعہ علماء کونسل پاکستان ءَ بلوچستان ءَ ٹوھیں لشکر کشی ءِ لوٹ کرتگ

مچھ وئیل ءِ ھلاپ ءَ شیعہ علماء کونسل پاکستان ءَ اسلام آباد ءَ پریس کانفرنس، بلوچستان ءَ ٹوھیں کچے ءَ لشکر کشی ءِ لوٹ کرتگ شیعہ علماء کونسل ءِ نیمگ ءَ ایرکرتگیں شرتانی نہ منّگ ءَ سرجمیں پاکستان ءَ زھرشانی زرمبشت ءِ جار جتگ –

دی بلوچستان پوسٹ

شیعہ علماء کونسل ءِ واکداراں گوشتگ کہ بلوچستان ءَ ھزارہ برادری بے دردی ءَ کشگ ءُ گیش بیوکیں ھونریچی ءَ تہ ءَ گیشی ءِ ھلاپ ءَ بلوچستان ءَ وزیریستان ءِ وڑیں لشکر کشی ءِ بہ کن ءُ ھزارہ برادری ءِ کوش ءَ دزمانجنیں مردماں سزا ءِ دار ءِ سر ءَ بیار –

اسلام آباد ءَ نیشنل پریس کلب ءَ شیعہ علما کونسل ءِ رھشون سید ساجد علی نقوی ءِ گوشگ ءِ سر ءَ شیعہ علماء کونسل پاکستان ءِ بنجاھی سیکٹری عباس علوی ءُ دگہ علماء رھشونانی ھمراھی ءَ پریس کانفرنس کرتگ ءُ چہ سرکار ءَ لوٹ کرتگ آ مچھ ءِ وئیل ءَ ھواریں مردمانی ھلاپ ءَ ٹوھیں لشکر کشی ءِ جار ءَ بہ جنت –

زانگ بہ بیت مچھ وئیل ءَ بیران بیتگیں مردمانی کھول گوستگیں چار روچاں شال ءِ شھدگ ءَ جونانی ھمراھی ءَ نشتگ اَنت ءُ اُستان ءِ وزیر ءُ پاکستان ءِ بنجاھی پتر ءِ وزیر کھولانی گون ءَ گپ ءُ تران ءَ بے سوب بیتگ اَنت –

زھرشانی کنوکانی لوٹ اِنت کہ تنا وھد ءَ سروزیر پاکستان وت نئیت ءُ مارا دوچار نہ کپ ایت تنا وھدی ما جونانی ھمراھی ءَ نندانک ءَ جاڑیگ اِنت –

مچھ وئیل ءَ کُشگ بیتگیں مردمانی مردماں چہ سرکار ءَ ھشت شرت ایرکرتگ بلے آیاں کجام ھم رنگیں لوٹ ئے تہ ءَ بلوچستان ءَ ٹوھیں کچے ءَ لشکر کشی ءِ لوٹ مان نہ اِنت –

ھزارہ برادری ءِ کوش ءِ ھلاپ یَ بلوچستان ءَ ھوار کراچی ءُ پاکستان ءِ دگہ شھر ءُ ڈنی ڈیھاں ھم ھزارہ برادری ءُ دگہ گلانی نیمگ ءَ زھرشانی نندانک برجاہ اَنت –